Innlent | mbl | 7.6.2022 | 23:15

Nýr dúkur hafi aldrei verið pantaður

Hamarshöllin í Hveragerði áður en hún fauk. Ljósmynd/Verkís

Nýr meirihluti bæjarstjórnar í Hveragerði segir fyrrum meirihluta Sjálfstæðisflokksins aldrei hafa pantað nýjan dúk frá slóvenska framleiðandanum Duol fyrir loftborið íþróttahús til að blása upp á grunni Hamarshallarinnar og að aldrei hafi verið gerður samningur um slíkt.

Þetta kemur fram í tilkynningu frá nýja meirihlutanum.

„Óljóst er hvers vegna þáverandi bæjarstjóri ákvað að fylgja ekki eftir ákvörðun þáverandi meirihluta Sjálfstæðisflokksins um að panta nýjan dúk frá Duol. Þó er ljóst að upplýsingar sem koma fram í frétt frá fyrrum bæjarstjóra á vef bæjarins frá 28. apríl sl. um að samningur hafi verið undirritaður um kaup á nýjum dúk frá Duol er ekki rétt þar sem enginn samningur virðist liggja fyrir, heldur aðeins tilboð sem hefur einungis verið undirritað af hálfu Hveragerðisbæjar, en ekki Duol,“ segir í tilkynningu.

Frétt af mbl.is

Hamarshöllin „hápólitískt mál“

Frétt af mbl.is

„Bæjarbúar lögðust á eitt“

Jafnframt kemur fram að upplýsingar sem koma fram í frétt frá fyrrum bæjarstjóra frá 21. maí um að hægt sé að afpanta dúkinn séu rangar þar sem ekki sé hægt að afpanta það sem aldrei hefur verið pantað. Þá er bent á að 70% upphæðarinnar af dúknum hafi ekki verið greidd fyrirfram en þess er krafist í tilboði frá Duol.

Nánast engin gögn lágu fyrir

„Því er ljóst að upplýsingar frá fyrrum meirihluta Sjálfstæðisflokksins og bæjarstjóra hans um pöntun og samningagerð á dúk frá Duol var ekki rétt og byggði ekki á neinum gögnum,“ segir í tilkynningunni.

Þá segir að Bæjarfulltrúar Okkar Hveragerðis og Framsóknar hafi kallað eftir upplýsingum um málið strax að loknum kosningum og þá hafi komið í ljós að nánast engin gögn lágu fyrir og erindinu var ekki svarað af fyrrum bæjarstjóra. Því var kallað eftir stöðu mála frá Duol.

„Samkvæmt sérfræðingum hjá Hveragerðisbæ þarf að blása húsið upp í síðasta lagi í ágúst en það má aðeins gera í mjög stilltu veðri. Ef dúkurinn berst eftir þann tíma er ekki víst að hægt verði að koma húsinu upp fyrir veturinn vegna þess að ekki er hægt að treysta á gott veður. Í þessu samhengi skipta miklu þær 6-8 vikur sem hafa tapast vegna aðgerðarleysis fyrrum meirihluta Sjálfstæðisflokksins í málinu.“

Héldu að dúkurinn væri í framleiðslu

Bendir meirihlutinn á að eins og flestir Hvergerðingar héldu þau að málið hefði verið sett í ferli af fyrrum meirihluta og dúkurinn væri í framleiðslu. Það hafi því miður ekki reynst rétt.

„Þá kemur fram í svari Duol að miðað við stöðuna sé möguleiki að afhenda nýtt loftborið íþróttahús úr verksmiðjunni í byrjun október. Þá á eftir að flytja dúkinn til Íslands og koma honum upp. Miðað við þessar upplýsingar er ljóst að ekki verður komin upp ný Hamarshöll fyrr en í fyrsta lagi í lok október, líklega síðar, hvaða leið sem farin verður í uppbyggingu hennar, hvort sem keypt er loftborið íþróttahús eða fjárfest í hagstæðu stálgrindarhúsi,“ segir í tilkynningunni.

Þegar Hamarshöllin féll.

Nýi eirihlutinn segir ábyrgðina á stöðunni liggja alfarið hjá fyrrum meirihluta en ábyrgðin á framhaldinu sé í þeirra höndum. Þau leggi áherslu á að leita verði allra leiða til að tryggja íþróttastarf Hvergerðina næsta vetur.

Tveir möguleikar

Möguleikarnir í stöðunni séu því tveir:

Að koma upp loftbornu íþróttahúsi með samningi við Duol. Samkvæmt upplýsingum frá Duol er fyrsti mögulegi afhendingartími úr verksmiðju í byrjun október. Þó þarf að afla nánari upplýsinga frá Duol, s.s. um kostnað, hvort að tilboð sem rann út í apríl standi enn, flutningstíma og kröfur sem Íþróttafélagið Hamar gerði um aðstöðu. Núverandi meirihluti hefur þegar sett af stað vinnu meðal starfsmanna bæjarins að afla þessara upplýsinga.
Samhliða hefur meirihluti Okkar Hveragerðis og Framsóknar óskað tilboða frá tveimur norskum aðilum á stálgrindarhúsum, þ.e. frá Besthall og MSO Sport & Invest. Húsin frá Besthall eru einangruð stálgrindarhús sem klædd eru með dúk en húsin frá MSO Sport & Invest eru stálgrindarhús sem eru einangruð með yleiningum. Teikningar af sökkli Hamarshallarinnar hafa verið sendar til þessara aðila sem skoða samhliða tilboðsgerð hvort að hægt sé að setja stálgrind á grunninn og hvort styrkja þurfi hann. Óskað hefur verið eftir upplýsingum um hvenær hægt verði að koma umræddum húsum upp.

„Það er von meirihlutans að allir sem að málinu hafa komið, Íþróttafélagið Hamar og öll bæjarstjórn muni vinna saman að því að leysa úr þessari alvarlegu stöðu sem upp er komin,“ segir í tilkynningunni.