Innlent | mbl | 15.2.2023 | 21:55

Tengist mögulega aukinni virkni í eldfjallinu

Hér má sjá bráðnun ísþekjunnar frá því í janúar. Ljósmynd/HÍ, NASA og ESA

Engar mælingar liggja fyrir sem geta útskýrt bráðnun ísþekjunnar á Öskjuvatni.

Ýmsar orsakir þykja líklegar, þar á meðal aukinn jarðhiti, en á vef Veðurstofunnar kemur fram að engin merki um slíkt séu á landi.

Stöðugt landris hefur verið við Öskju frá því í ágúst árið 2021. Ástæðan er talin vera kvikuinnskot sem talið er vera á 2 til 3 kílómetra dýpi.

Haft er eftir Benedikt G. Ófeigssyni, sérfræðingi í jarðskorpuhreyfingum á Veðurstofu Íslands, að engin gögn tengi ísleysið nú við landrisið. Hann segir þó möguleika að ísleysið tengist aukinni virkni í eldfjallinu.

Frétt af mbl.is

Enn eitt merkið um að það sé að lifna yfir kerfinu

Svipaður atburður 2012

Á nýlegum gervitunglamyndum af vatninu sést að ísinn hefur hörfað að miklu leyti sem þykir afar óvenjulegt á þessum tíma árs.

Svipaður atburður átti sér stað í febrúar árið 2012, fyrir utan að ekkert landris átti sér stað. Niðurstöður úr mælingum þá sýndu heldur engin mælanleg merki um aukinn jarðhita.

„Nægur varmi er í vatninu sjálfu til að bræða ísinn en til þess þarf að koma vatninu undir ísnum á hreyfingu, þetta gætu verið breytingar í jarðhita, gasuppstreymi, skriður eða vindur sem kemst í opna vök,“ segir í færslunni.

https://www.mbl.is/frettir/innlent/2023/02/13/islausa_svaedid_rumlega_tvofaldast_ad_staerd/

Sérstakar veðuraðstæður

Þá kemur einnig fram að önnur skýring gæti verið að sérstakar veðuraðstæður hafi orsakað þessa bráðnun en sterkir suðlægir vindar hafa geysað um hríð ásamt nokkrum hlýindum. Mældist hitastig við Upptyppinga 5 til 9 stig á tímabili.

Veðurstöð við Upptyppinga er í um 25 kílómetra fjarlægð frá Öskjuvatni sem stendur um 600 metra hærra. Önnur vötn á Hálendinu eru þó enn ísilögð og engin merki um að þau séu að opnast vegna veðuraðstæðna.