Umferðartafir vegna elds í tengivagni

Eldur kviknaði í dekkjabúnaði á tengivagni vörubíls sem var á ferðinni á Reykjanesbraut, skammt frá IKEA, eftir hádegi í dag.

Tilkynning um eldinn barst klukkan rétt rúmlega tvö, að sögn varðstjóra hjá slökkviliðinu á höfuðborgarsvæðinu.

Vel gekk að slökkva eldinn. mbl.is/Eggert Jóhannesson

Ökumaður vörubílsins náði að aftengja tengivagninn eftir að eldurinn kviknaði.

Að sögn varðstjórans gekk slökkviliðinu vel að slökkva eldinn en töluverður reykur steig upp á svæðinu um skamma hríð, eins og sjá má í meðfylgjandi myndskeiði. Engin hætta var á ferð, bætir hann við aðspurður.

Uppfært kl. 15.29:

Umferðin gengur hægar en venjulega á Reykjanesbraut vegna eldsvoðans, að því er segir í tilkynningu frá lögreglunni á höfuðborgarsvæðinu. Af þeim sökum er aðeins önnur akreinin opin til vesturs (að Hafnarfirði) og verður svo eitthvað áfram.

Ökumenn eru vinsamlegast beðnir um að sýna tillitssemi vegna þessa.

mbl.is/Eggert Jóhannesson

• Blogga um frétt