Blái hnötturinn í íslenskri leikstjórn í London

Ungur íslenskur leikstjóri, Jón Gunnar Þórðarson, mun leikstýra Bláa hnettinum eftir Andra Snæ Magnason í London og gengið hefur verið frá samningi um að frumsýna leikritið á föstudaginn langa á næsta ári í Cochrane Theatre.

Jón Gunnar útskrifast í sumar með BA-gráðu í leikstjórn frá Drama Centre London en þrátt fyrir að hafa ekki lokið námi er hann með mörg járn í eldinum.

Upphafið að sýningunni má rekja til verkefnis í lok síðasta skólaárs Jóns Gunnars þar sem hann átti að leiðbeina leikurum í leiklestri á einhverju verki sem aldrei hefði verið sett upp í Bretlandi. Á leiklesturinn bauð hann leikhúsframleiðendum og umboðsmönnum og vakti tiltækið áhuga. Til stendur að sýna verkið í sex vikur og ferðast síðan með það um helstu borgir Englands. „Þetta er verk með ádeilu,“ segir Jón Gunnar. „Það vekur vonandi fólk til umhugsunar, en það er einmitt þannig leikhús sem ég vil búa til.“

Sjá nánar í sunnudagsblaði Morgunblaðsins.