Skid Row á NASA

Bandaríska þungarokkshljómsveitin Skid Row er væntanleg hingað til lands, en hún mun halda tónleika á NASA á fullveldisdaginn, 1. desember. Um er að ræða síðustu tónleika sveitarinnar í Evróputúr hennar.

Skid Row kemur hingað til lands á vegum íslensku rokksveitarinnar Sign, en eins og fram kom í Morgunblaðinu fyrir rúmum mánuði síðan mun Sign hita upp fyrir Skid Row á tónleikaferð sveitarinnar um Bretlandseyjar í nóvember. Alls er um að ræða 12 tónleika víðsvegar um Bretland dagana 13. til 25. nóvember. Liðsmenn Sign eru að sögn miklir aðdáendur Skid Row og gerðu meðal annars lag þeirra, „Youth Gone Wild", að sínu á safndiski á vegum tímaritsins Kerrang! Líkt og á tónleikunum í Bretlandi mun Sign hita upp fyrir Skid Row á NASA.

Skid Row var stofnuð árið 1986 og var ein vinsælasta rokksveit heims undir lok níunda áratugar síðustu aldar, en hún var gjarnan kennd við glysrokkstefnuna svokölluðu.

Miðasala fer fram á midi.is og hefst hún mánudaginn 29. október.

www.skidrow.com