Tvítugur Bandaríkjamaður var dæmdur í 27 ára fangelsi fyrir að hafa ráðist á lögreglumenn með sveðju á gamlárskvöld árið 2022 á Times Square í New York-borg.
Trevor Bickford var búsettur í Maine-ríki þegar hann ferðaðist til borgarinnar til þess að fremja árásina. Þúsundir manna safnast saman á Times Square til þess að fagna áramótunum ár hvert.
Þrír lögreglumenn særðust í árásinni.
Damian Williams saksóknari sagði að Bickford hefði verið innblásinn af róttækri íslamskri öfgahyggju. Samkvæmt dómsskjölum hafði hann áhuga á að fara erlendis til þess að deyja sem píslarvottur, en að lokum hefði hann ákveðið að fremja árás á bandarískri grundu.
Hann var ákærður fyrir líkamsárás og tilraun til manndráps. Bickford játaði sök í janúar.