Sandra María Jessen heldur áfram að hirða fyrirsagnirnar í Bestu deild kvenna í fótbolta og er markahæst í deildinni eftir þrjár umferðir.
Ekki nóg með það heldur hefur hún skorað öll sjö mörk Þórs/KA í deildinni til þessa.
Með mörkunum tveimur sem tryggðu Akureyrarliðinu sigur á Þrótti, 2:1, í Boganum í 3. umferðinni er hún komin í sextánda sætið yfir markahæstu leikmenn deildarinnar frá upphafi með 96 mörk. Sandra fór með því fram úr Valskonunni Dóru Maríu Lárusdóttur sem er nú í 17. sætinu með 94 mörk.
Jordyn Rhodes er annar leikmaður sem hefur séð um markaskorun síns liðs á tímabilinu. Hún skoraði bæði mörk Tindastóls í góðum útisigri á Stjörnunni, 2:0. Fyrstu stig og mörk Skagfirðinga, og fyrstu mörkin sem Jordyn skorar í deildinni.
Vigdís Lilja Kristjánsdóttir úr Breiðabliki og Amanda Andradóttir úr Val hafa eins og Sandra skorað í þremur fyrstu leikjum sinna liða á tímabilinu. Vigdís er nú búin að skora jafnmörg mörk í þessum þremur leikjum Breiðabliks, fimm talsins, og hún hafði skorað í fyrstu 39 leikjum sínum í efstu deild fyrir þetta tímabil.
Selma Dögg Björgvinsdóttir skoraði langþráð fyrsta mark sitt í efstu deild, í sínum 52. leik í deildinni. Það var seinna mark Víkings í stóru tapi gegn Val á Hlíðarenda, 7:2.
Ragnheiður Þórunn Jónsdóttir skoraði einnig fyrsta mark í deildinni í sama leik, fyrir Val, en það var í hennar þriðja leik. Ragnheiður, sem er aðeins 16 ára, skoraði 13 mörk fyrir Hauka í 2. deild í fyrra.
Úrslitin í 3. umferð:
Valur - Víkingur R. 7:2
Þór/KA - Þróttur R. 2:1
Fylkir - Keflavík 4:2
Breiðablik - FH 3:0
Stjarnan - Tindastóll 0:2
Markahæstar:
7 Sandra María Jessen, Þór/KA
5 Vigdís Lilja Kristjánsdóttir, Breiðabliki
4 Amanda Andradóttir, Val
3 Eva Rut Ásþórsdóttir, Fylki
3 Jasmín Erla Ingadóttir, Val
2 Agla María Albertsdóttir, Breiðabliki
2 Hafdís Bára Höskuldsdóttir, Víkingi
2 Hannah Sharts, Stjörnunni
2 Jordyn Rhodes, Tindastóli
2 Sigdís Eva Bárðardóttir, Víkingi
Næstu leikir:
8.5. Breiðablik - Stjarnan
8.5. FH - Þróttur R.
8.5. Keflavík - Valur
9.5. Víkingur R. - Þór/KA
9.5. Tindastóll - Fylkir