Hugo Lloris, markvörður og fyrirliði franska landsliðsins, hrósaði Gylfa Þór Sigurðssyni, fyrrverandi félaga sínum hjá Tottenham, á fréttamannafundi á Stade de France í morgun.
„Ég eyddi tíma með Gylfa hjá Tottenham. Hann er æðislegur náungi og mér finnst hann frábær leikmaður. Því miður þar sem hann er Íslendingur hefur hann ekki náð að sýna sig á stóra sviðinu. Hann átti frábært tímabil með Swansea og það stafar ógn af honum í föstum leikatriðum. Hann getur skorað með hægri og vinstri og er frábær skotmaður,“ sagði Lloris en Frakkar mæta Íslendingum í 8-liða úrslitum Evrópumótsins í knattspyrnu á Stade de France annað kvöld.
Um íslenska liðið sagði Lloris:
„Það er engin tilviljun að Ísland komst áfram. Liðsheildin var frábær hjá íslenska liðinu í sigrinum gegn Englendingum og leikmenn sýndu að þeir eru með stórt hjarta. Þeir vinna vel saman, föstu leikatriðin þeirra og innköstin eru hættuleg og við berum mikla virðingu fyrir Íslandi.“