Lánshæfismatsfyrirtækið Moody's varaði við því í dag að Ungverska bankakerfið væri í hættu vegna þess hversu stór hluti lána þeirra er í erlendri mynt. Þá lækkaði fyrirtækið styrkleikaeinkunn átta ungverskra banka.
Moody's sagði allt benda til „hraðrar hnignunar ungverska viðskiptaumhverfisins," og sagði landið vera með „eitt áhættusæknasta bankaerfið í Mið- og Austur-Evrópu," vegna mikillar lánatöku erlendis.
Í yfirlýsingu fyrirtækisins segir að áhættan í ungverska bankakerfinu hafi aukist mjög hratt, vegna aukins óstöðugleika forintunnar (gjaldmiðils Ungverjalands) og vegna 5% samdráttar í hagkerfinu á þessu ári.
Þá segir að ungversku bankarnir séu undir þrýstingi vegna aukinna vanskila fyrirtækja, samhliða hnignun fjármálageirans, verri atvinnuhorfum og mögulegrar lækkunar á húsnæðismarkaði.
„Við teljum að þessi áföll séu líkleg til að veikja eiginfjárstöðu flestra ungverskra banka til muna á næstu tveimur árum," segir í yfirlýsingunni. Þá hafi geta ríkisins til að koma bönkunum til hjálpar einnig veikst.
Moody's lækkaði styrkleikaeinkunn OTP bankans, OTP veðlánabankans, CIB banka, K&H banka, MKB banka, Erste Hungary banka og Budapest banka, auk þess sem fyrirtækið lækkaði langtíma lánshæfiseinkun fyrir MFB Hungarian þróunarbankann.