Fryst lifandi til að viðhalda fegurðinni

Pamela Anderson er tilbúin að gera ýmislegt til að viðhalda æskublómanum - svo mikið að hún er tilbúin að láta frysta sig lifandi.

Ein skringilegasta fegurðarmeðferð í heimi kallast Kriotherapy og felur í sér að meðferðarþeginn er frystur. Fyrst er hann reyndar klæddur í sérstaka sokka, hanska, ennisband, andlitsgrímu og nærföt og því næst lokaður inn í sérstökum frystiklefa þar sem hann hafður í 130 gráðu frosti í þrjár mínútur.

Fullyrt er að meðferðin geri kraftaverk og geti læknað bæði sjúkdóma, íþróttameiðsl, appelsínuhúð og almenna þreytu.

Meðferðin virkar þannig að við ógnarkulda fer líkaminn í sérstakt ástand þar sem hann lokar fyrir blóðflæði til fótleggja og handa. Fyrir vikið er hámarksblóðflæði til líffæra og heila auk þess sem að líkaminn framleiðir seratónín í miklu magni en seratónín er oft nefnt gleði-hormónið.

Meðal frægra aðdáenda þessarar meðferðar eru Pamela Anderson og Tony Blair, fyrrverandi forsætisráðherra Bretlands.