IKEA pokinn í íslenskri fatalínu

IKEA-pokinn komst í fréttir þegar Balenciaga hannaði tösku sem lítur næstum alveg eins út. Nú hefur INKLAW hannað línu í samvinnu við IKEA. 

„Eftir að Balenciaga gerðu þessa tösku byrjaði eitthvað rosalegt IKEA hype í tískuheiminum. Fólk úti í heimi fór að búa til alls konar hluti úr hefðbundnum IKEA-pokum, s.s. grímur, nærbuxur, brjóstahaldara, töskur og margt fleira,“ segir Anton Sigfússon hjá íslenska fatamerkinu INKLAW en fyrirtækið bjó til tískulínu sem er innblásin af IKEA. Línan kallast IKEA X INKLAW. 

„Snemma í síðustu viku fengum við svo þá hugdettu að taka þátt í þessu æði. Vissum við að þetta yrði miklu flottara ef við gætum fengið IKEA á Íslandi til að taka þátt í þessu með okkur, enda vitum við ekki til þess að neinar af þessum IKEA-hönnunum hafi verið gerðar í beinu samstarfi við IKEA-verslun. Bókstaflega 15 mínútum eftir að við höfðum sent þeim skilaboð fengum við jákvætt svar frá þeim. Þau létu okkur í kjölfarið fá slatta af hinum víðfrægu IKEA-pokum og fór svo að við gerðum úr þeim peysur, buxur og jakka í mjög takmörkuðu upplagi. Við fengum svo auðvitað að laumast inn í IKEA eftir lokun til þess að taka myndir fyrir línuna,“ segir hann.