„Þeir sem hafa unnið í þessum bransa hafa heyrt af (og prófað) af ótal undarlegar húðmeðferðir. Það kom sá tími þar sem fólk taldi að fylgjur gætu lagað hrukkur og svo hafði sniglaslím sitt vægi. Svo höfum við reynt að gleyma „vampíru-meðferðinni“ sem Kim Kardashian gerði vinsæla,“ skrifar fegurðarritstjóri Popsugar, Jessica Cruel, í nýjan pistil. „Nýjasta töfraæðið hvað varðar húðumhirðu er þá...hland,“ skrifar Cruel og á þá við hland úr manneskju.
Cruel er ekki sannfærð og er ekki tilbúin til að prófa hland-meðferðina. „Tilhugsunin um að setja hland á andlitið fær mig til að kúgast, en því fylgja víst einhverjir ávinningar, t.d. að það er algjörlega ókeypis. En án djóks,“ skrifar Cruel sem er nú nóg boðið.
Samkvæmt upplýsingum sem finna má á heimasíðu The Telegraph geta nokkrir dropar af hlandi til dæmis þurrkað upp bólur á örskotstundu. Hlandið er ekki bara eintómur útgangur heldur leynast einhver vítamín og bætiefni í því sem geta haft góð áhrif á húðina samkvæmt heimildum The Telegraph. Þær sem ætla sér að prófa þessa...áhugaverðu aðferð geta þá bleytt bómullarhnoðra með pissi og strokið honum svo yfir andlitið. Þá er einnig hægt að blanda nokkrum pissudropum út í rakakremið áður en það er borið á.
Ekki er öll vitleysan eins.