Andriy Shevchenko var hetja Úkraínumanna þegar þeir lögðu Svía, 2:1, í D-riðli á Evróðumótinu í knattspyrnu en liðin áttust við í Kiev í kvöld.
Zlatan Ibrahimovic kom Svíum yfir í byrjun seinni hálfleiks en Shevchenko, þessi mikli markaskorari, svaraði með tveimur góðum skallamörkum.
Úkraínumenn voru sterkari aðilinn og unnu verðskuldað og verður gaman að sjá til þeirra í leikjunum gegn Frökkum og Englendingum en Úkraínumenn eru með forystu í D-riðlinum þar sem Frakkar og Englendingar gerðu 1:1 jafnteflui.
Bein textalýsing frá leiknum:
90+5 Leiknum er lokið með 2:1 sigri Úkraínumanna. Þeir fagna ógurlega.
89. Svíar í dauðafæri en Johani Elmander brást bogalistin í upplögðu færi. Hann skaut boltanum yfir markið.
76. Zlatan átti hörkuskot sem markvörður Úkraínumanna þurfti að hafa sig allan við að verja.
62. MARK!! Úkraínumenn eru komnir í 2:1 og aftur var það Shevchenko sem skoraði. Þessi mikli markaskorari skoraði með aftur með skalla, nú eftir hornspyrnu. Svíar sofnuðu greinilega á verðinum eftir að þeir komust yfir.
55. MARK!! Úkraínumenn voru ekki lengi að svara fyrir sig. Shevchenko skallaði í netið frá markteig eftir góða fyrirgjöf frá hægri kanti. Seinni hálfleikur byrjar með látum.
52. MARK!! Svíar eru komnir í 1:0 og hver annar en Zlatan Ibramovich skoraði markið. Eftir þunga sókn sendi Kim Källström fastan boltann fyrir markið og þar var Zlatan á réttum stað og skoraði af stuttu færi.
49. Rosenberg framherji Svíanna komst í gott færi en varnarmenn Úkraínumanna náðu að bjarga á elleftu stundu. Svíarnir hafa byrjað seinni hálfleikinn vel en þeir voru daufir í fyrri hálfleiknum.
46. Seinni hálfleikur er hafinn.
45+1 Það er búið að flauta til hálfleiks. Staðan er, 0:0, þar sem Úkraínumenn hafa verið sterkari aðilinn. Þeir hafa sótt hratt upp kantana og Svíar hafa átt í talsverðu basli í leiknum. Þeim hefur gengið illa að halda boltanum innan liðsins og eru meira í því að kýla boltanum fram völlinn.
37. Stöngin!! Svíar voru hársbreidd frá því að komast yfir en skalli frá Zlatan fór í stöng og framhjá markinu.
30. Rosenberg með ágætt skot en Pyatov var vel á verði í marki Úkraínumanna.
23. Dauðafæri!! Shevchenko komst í dauðafæri en skot framherjans var misheppnað og boltinn skoppaði framhjá markinu.
17. Hurð skall nærri hælum upp við mark Úkraínumanna en markvörður þeirra náði að bjarga á síðustu stundu.
7. Úkraínumenn, vel studdir af meirihluta áhorfenda, byrja betur en engin færi hafa litið dagsins ljós.
1. Leikurinn í Kiev er hafinn. Sigurliðið kemst á topp riðilsins.
0. Þeir fyrrverandi leikmenn úr ensku úrvalsdeildinni leika í fremstu víglínu hjá Úkraínumönnum. Það eru Andriy Shevchenko fyrrum leikmaður Chelsea og Andrei Voronin sem um tíma var á mála hjá Liverpool.
0. Svíar leggja allt sitt traust á Zlatan Ibrahimovic en hann er fyrirliði Svíanna og þeirra helsta stórstjarna.
Úkraína: Pyatov, Gusev, Mykhalyk, Khacheridi, Selin, Yarmolenko, Tymoschuk, Konoplianka, Nazarenko, Voronin, Shevchenko. Varamenn: Koval, Kucher, Garmash, Aliev, Shevchuk, Rakitskiy, Butko, Goryainov.
Svíþjóð: Isaksson, Lustig, Mellberg, Granqvist, Martin Olsson, Elm, Kallstrom, Larsson, Ibrahimovic, Toivonen, Rosenberg. Varamenn: Wiland, Svensson, Jonas Olsson, Antonsson, Wernbloom, Safari, Holmen, Hansson.
Dómari: Cuneyt Cakir (Tyrklandi)