Meðlimum stuðningsmannasveitarinnar Tólfunnar hefur verið boðið flug til Parísar þar sem leikur Íslands og Frakklands í 8-liða úrslitum á EM fer fram á sunnudag.
Tekin hefur verið á leigu 180 sæta flugvél sem á að ferja íslenska stuðningsmenn á leikinn í Frakklandi. Flogið er út á föstudag og heim á mánudagskvöldi og hafa um 100 miðar selst.
Frétt mbl.is: WOW býður Tólfunni til Frakklands
Tíu meðlimir Tólfunnar fá ókeypis flugmiða gegn því að allavega 140 einstaklingar kaupi sér flugmiða. Annars kostar flugmiði 129.900 en með miða á völlinn kostar ferðin frá 169.900 upp í 199.900. Verðið fer eftir því hvar sætin eru á vellinum.
Nánari upplýsingar er hægt að nálgast á facebooksíðu ferðarinnar.
Áður hafði komið fram að óvíst væri hvort nokkrir af helstu stuðningsmönnum íslenska landsliðsins og meðlimir Tólfunnar yrðu á áhorfendapöllunum í París á sunnudaginn þegar íslenska landsliðið mætir því franska.