Aron Snær Júlíusson úr GKG sem efstur var að loknum fyrsta hring á Íslandsmótinu í golfi fékk snjókallinn alræmda á skortortið sitt á 2. braut á Jaðarsvelli í dag.
2. brautin er par 5 og þykir ekki erfið í hægviðri eins og nú er en Aroni voru eitthvað mislagðar hendur og fór hann brautina á 8 höggum.
Aron er búinn að leika sex holur í dag og hefur hrapað niður listann en hann setti vallarmet í gær þegar hann lék á 67 höggum, fjórum undir pari.
Nokkrir kylfingar hafa byrjað vel í dag og sérstaklega byrjaði Guðmundur Ágúst Kristjánsson úr GR með látum. Hann fékk fugla á fyrstu þrjár holurnar og er nú samtals á tveimur undir pari.
Birgir Leifur Hafþórsson úr GKG er efstur á þremur undir pari samtals. Hann hefur fengið tvö pör og einn fugl í dag.