Olíuinnflutningur Kínverja jókst um 18,1% á fyrstu átta mánuðum ársins miðað við sama tímabil á síðasta ári. Að sögn fréttastofunnar Xinhua nam innflutningurinn 773 milljónum tunna en á móti voru fluttar út 15,5 milljónir tunna.
Kínverjar eru aðrir helstu olíuneytendur heims á eftir Bandaríkjamönnum og eftirspurn heldur stöðugt áfram að vaxa enda er hagvöxtur mikill í landinu, var 11,9% á síðasta ársfjórðungi.
Kínverjar voru lengi sjálfum sér nógir með olíu en á 10. áratug síðustu aldar breyttist það. Hafa Kínverjar í kjölfarið m.a. aukið samskipti við Írana, Súdana og aðra olíuframleiðendur sem Vesturlönd eru að reyna að einangra.