Ekki er nóg að horfa á brúttó skuldastöðu hins opinbera á ákveðnum tímapunkti til að sjá raunverulega stöðu ríkis og sveitarfélaga.
Á fyrirlestri í Háskóla Íslands sögðu hagfræðinemarnir Guðmundur S. Guðmundsson og Ólafur Garðar Halldórsson að gríðarleg óvissa væri um ákveðna þætti í skuldastöðu ríkisins. Hins vegar yrði að horfa til vaxta á lánum ríkisins og möguleika þess til að standa undir vöxtum og afborgunum. Nefndu þeir sem dæmi að væru nafnvextir á skuldum ríkisins að meðaltali um 6% og hagvöxtur 2% þyrfti að reka ríkissjóð með ríflega 40 milljarða króna afgangi ættu skuldir ríkisins ekki að hækka á milli ára.
Meðal óvissuþátta eru t.d. hve mikið fáist upp í skuldbindingar Icesave reikninga Landsbankans erlendis. Þá geti gengi krónunnar haft umtalsverð áhrif á skuldastöðuna. Mikil óvissa sé enn ríkjandi varðandi endurfjármögnun bankanna.