Milljarður punda fór til eigenda í gegnum lán og kaup Landsbanka

Tæplega milljarður punda, eða sem nemur rúmlega 188 milljörðum króna, rann til fyrrverandi eigenda verslanakeðjunnar Iceland Foods Group Limited.

Afkoma Iceland var góð á síðasta ári, en hagnaður fyrirtækisins fyrir skatta og fjármagn jókst um 19% milli ára. Skuldir þess hlaupa hins vegar á hundruðum milljóna punda.

Þær skuldir eru helst tilkomnar vegna arðgreiðslu til eigenda fyrirtækisins á árinu 2007, en þá áttu Baugur og Fons stærstan hlut í fyrirtækinu. Iceland var þá selt á milli tengdra félaga, en Landsbankinn í London undir forystu Lárusar Welding lánaði 280 milljónir punda til félagsins Icebox Holding til að kaupa Iceland af félagi í eigu Baugs, Fons og annarra.

Á árinu 2008 seldu Baugur og Fons Iceland síðan inn í Landsbankann og lítinn hluta til Glitnis í smáum skrefum fyrir tæplega 700 milljónir punda.