Ríkissjóður býðst til að kaupa erlend skuldabréf

Seðlabanki Íslands, fyrir hönd ríkissjóðs, býðst til að kaupa á nafnverði, að hluta eða í heild, þau erlendu skuldabréf ríkissjóðs sem falla í gjalddaga árin 2011 og 2012. 

Um er að ræða tvö skuldabréf í evrum sem upphaflega voru að fjárhæð 1250 milljónir evra, 204 milljarðar króna, að nafnvirði. Seðlabankinn hefur þegar keypt hluta þessara bréfa á markaði, en enn eru um 800 milljónir evra, um 130 milljarðar króna, útistandandi.

Segir Seðlabankinn, að þessi kaup séu þáttur í lausafjár- og skuldastýringu ríkisjóðs, en einnig liður í gjaldeyrisforðastýringu Seðlabanka Íslands. 

Gjaldeyrisforði Seðlabankans nam 767 milljörðum króna, 4,7 milljarða evra, í lok mars 2011. Segir á heimasíðu Seðlabankans, að bankinn og ríkissjóður séu því í góðri stöðu til að greiða þau erlendu lán sem falla í gjalddaga samkvæmt lánasamningum á næstu árum, þar á meðal þau skuldabréf sem hér um ræði.

Endurkaupin skapi einnig tækifæri til að bæta ávöxtun gjaldeyrisforðans í núverandi lágvaxtaumhverfi. Að auki sé höfð hliðsjón af nýlegum tilkynningum frá lánshæfismatsfyrirtækjum og gefi tilboðið eigendum verðbréfanna færi á að selja þau á nafnverði með skipulögðum hætti ef þeir svo kjósa.

Útboðið geti einnig gefið ríkissjóði upplýsingar um afstöðu erlendra fjárfesta gagnvart Íslandi í því ástandi sem nú er uppi sem einkennist annars vegar af verulega bættri stöðu efnahagsmála og hins vegar af óvissum horfum varðandi lánshæfismat ríkissjóðs í kjölfar þess að Icesave-samkomulaginu var hafnað í þjóðaratkvæðagreiðslu.

Tilboðið stendur til 5. maí næstkomandi og verður niðurstaða þess kynnt opinberlega eigi síðar en 6. maí 2011.

• 1 blogg um fréttina

Bloggað um fréttina

• Guðmundur Ásgeirsson: Hvað þýða þessi viðskipti?