Franz Jezorski, fyrrverandi eigandi í bílaumboðinu Heklu, er einn þeirra sem koma að fjárfestingu í nýju hóteli sem byggja á við Þórunnartún í Reykjavík, beint á móti nýja hótelturninum á Höfðatorgi. Auk Franz er Magnús Einarsson fasteignasali stærsti eigandi að félaginu Þórunnartúni 4 slf. sem á fasteignina og stefnir á að gera talsverðar endurbætur á húsinu.
Breytingartillaga um húsnæðið er nú í vinnslu hjá umhverfis- og skipulagsráði Reykjavíkur, en í þeim gögnum sem hafa verið lögð fram er óskað eftir því að auka við byggingarmagn á lóðinni. Húsnæðið er í dag rúmir 1.700 fermetrar með leyfi fyrir stækkun upp á 580 fermetra. Samkvæmt breytingartillögunni er horft til þess að leyfð stækkun verði 990 fermetrar. Samkvæmt frétt Morgunblaðsins frá síðustu viku er gert ráð fyrir tæplega 100 herbergjum á hótelinu en ekki hefur enn verið tekin ákvörðun um það í skipulagsráði.
Horft er til þess að hótelið verði venjulegt borgarhótel þar sem ekki er gert ráð fyrir ráðstefnusölum. Nú þegar hefur lítið hliðarhús verið rifið við húsið, en í framhaldinu verður farið í mikla endurnýjun á húsinu sjálfu.
Franz seldi hlut sinn í bílaumboðinu Heklu á síðasta ári, en í um hálft ár þar á undan hafði staðið styr um endanlegt eignarhald á fyrirtækinu. Í febrúar 2011 keypti Franz Heklu ásamt viðskiptafélaga sínum Friðbert Friðbertssyni. Árið 2013 ætlaði Franz að kaupa Friðbert út samkvæmt samkomulagi þeirra á milli en það gekk ekki upp. Að lokum keypti Volkswagen í Danmörku hlut Franz og varð meðeigandi í félaginu með Friðbert.
Franz hefur áður meðal annars unnið við fasteignasölu og lögmannsstörf. Magnús er fasteignasali hjá Landmark fasteignasölu. Þeir eiga Þórunnartún 4 slf í gegnum félögin Þ4 ehf. og TD á Íslandi ehf., en hvort félag á 49,5% hlut í Þórunnartúni. Þá á félagið Hótelbyggingar ehf. 1% hlut í verkefninu.
Félagið mun ekki koma að rekstri hótelsins, heldur er verið að ræða við erlendar hótelkeðjur um reksturinn.