Síminn hringdur inn í Kauphöllina
Setja bókamerki
Orri Hauksson, forstjóri Símans, hringdi inn fyrstu viðskipti með bréf félagsins á Aðalmarkaði Nasdaq Iceland í morgun. Blásið var til skráningarathafnar í húsakynnum fyrirtækisins.
Í dag hefjast viðskipti með hlutabréf Símans en félagið er það sjötugasta sem tekið er til viðskipta á mörkuðum Nasdaq Nordic á árinu 2015.
Líkt og fram hefur komið var gengi í verðfrjálsum hluta frumútboðs 3,4 krónur á hlut. IFS greining bendir á að athyglisvert sé að hlutabréf í Fjarskiptum hf. hafa hækkað jafnt og þétt frá 5. október, þegar útboð Símans hófst, eða samtals um 6,8%. „Má því segja að bréf Fjarskipta hafi orðið æ traustari grunnur fyrir upphaf viðskipta með bréf Símans – og hentar það eflaust mörgum,“ segir IFS.
Síminn er stærsta fjarskiptafélagið á Íslandi með um 820 starfsmenn og á rætur sínar að rekja til ársins 1906. Félagið á að fullu sex dótturfélög sem eru Míla, Sensa, Staki, On-Waves, Talenta og Radíómiðun. Starfa þau öll í kjarnastarfsemi Símans sem er fjarskipti, fjölmiðlun og upplýsingatækni, bæði á Íslandi og erlendis.
Viðskiptavinir eru um 115 þúsund talsins, þar af eru um 88% einstaklingar, en til þeirra má rekja um 48% af tekjunum.
Ánægjulegar viðtökur
„Skráning Símans á Aðalmarkað Nasdaq Iceland er mjög mikilvægt skref fyrir félagið og fjárfesta. Það var því afar ánægjulegt að sjá góðu viðtökurnar við útboðinu á hlutabréfunum og þá tiltrú sem fjárfestar sýndu félaginu,“ er haft eftir Orra Haukssyni, forstjóra Símans, í tilkynningu.
„Sem fyrr erum við hjá Símanum ákveðin í að halda áfram að gera okkar allra besta fyrir viðskiptavini okkar, hluthafa og nýja fjárfesta á hörðum samkeppnismarkaði og þannig viðhalda því trausti sem okkur hefur verið sýnt.“
„Við bjóðum Símann hf. innilega velkominn á Aðalmarkaðinn,“ er þá haft eftir Páli Harðarsyni, forstjóra Nasdaq Iceland. „Síminn er sannarlega góð viðbót við hlutabréfamarkaðinn og styrkir bæði fjarskiptageirann á honum sem og markaðinn í heild sinni. Við hlökkum til að styðja við félagið með þeim aukna sýnileika sem fylgir skráningu á Aðalmarkað.“
Aðalmarkaðir og Nasdaq First North á Nasdaq Copenhagen, Nasdaq Helsinki, Nasdaq Iceland og Nasdaq Stockholm.
Hafa þurft að stugga við fólki
Skimað fyrir kíghósta meðal leikara
Rímar „engan veginn“ við Veðurstofuna
Hvað verður um plastið?
Mun ekki framselja vald sitt til Felix
Vísa mótmælanemendum úr skólanum
Ræða um rekstrarleyfi til 16 ára