Eigendur rafræna gjaldmiðilsins bitcoin gætu tapað um 36% andvirðis eininga sinna í miðlinum eftir að tölvuþrjótar hökkuðu sig inn í netkerfi Bitfinex, kauphallarinnar í Hong Kong, og stálu bitcoin-einingum að andvirði 65 milljóna dala í síðustu viku.
Bitfinex var lokað í kjölfarið en hefur nú byrjað að opna aftur. Þá hefur kauphöllin ákveðið eftir „mikla umhugsun, greiningu og ráðgjöf“ að leggja sama tap á alla notendur, líka þá sem urðu ekki fyrir árás tölvuþrjótanna. Það þýðir að allir eigendur bitcoin gætu misst allt að 36% verðmæta þeirra á næstu dögum.
Þær upphæðir sem eigendurnir tapa verða sérstaklega merktar og er það gert til þess að fylgjast með hvað hver á inni hjá fyrirtækinu og verður stefnt að því að greiða öllum tjónið til baka.
Að sögn Bitfinex eru þær viðræður þó á byrjunarstigi og líklega muni taka tíma að borga öllum til baka. Þá er einnig möguleiki að fólk geti fengið borgað til baka í hlutabréfum hjá eiganda Bitnifex, iFinex Inc.