Krónan þarf ekki endilega að veikjast
Kristinn Ingi Jónsson
Setja bókamerki
„Þetta eru mjög jákvæð en á sama tíma varfærin skref,“ segir Hrafn Steinarsson, hagfræðingur hjá greiningardeild Arion banka, um næstu skref í losun fjármagnshafta sem kynnt voru í gær.
Frumvarpið, sem kynnt var í gær og verður lagt fram á þingi í dag, felur í sér rýmkun á höftunum fyrir einstaklinga og fyrirtæki annars vegar við gildistöku laganna og hins vegar um næstu áramót.
Hrafn segir að beðið hafi verið eftir því að þessi skref yrðu stigin. Tímasetningin nú sé kjörin til þess.
„Ástæðan er sú að nafngengi krónunnar hefur verið að styrkjast hratt vegna þess að fjármagnsinnflæði er leyft en ekki fjármagnsútflæði. Það er kominn tími til þess að meira jafnvægi komist á fjármagnsflutninga. Að það sé opnað fyrir útflæði á móti innflæðinu,“ segir hann í samtali við mbl.is.
Krónan þarf ekki endilega að veikjast
Hann segir að aðgerðirnar muni eflaust hafa einhver áhrif á gengi krónunnar. „Heilt yfir hefur gjaldeyrissköpun hagkerfisins verið það mikil, sérstaklega yfir sumarmánuðina þegar ferðamannastraumurinn er hvað mestur, að gengi krónunnar hefur verið að styrkjast, jafnvel þótt Seðlabankinn hafi lagst á móti fjármagnsinnflæði með gjaldeyriskaupum svo nemi tugum milljarða króna.
Þannig að það þarf ekki endilega að þýða að veiking krónunnar fylgi losun hafta. Það gæti alveg eins verið að krónan haldist stöðug eða styrkist jafnvel eitthvað.“
Hann bætir því jafnframt við að gjaldeyrisforði Seðlabankans sé orðinn nokkuð stór. Seðlabankinn hafi því bolmagn til þess að grípa inn í og beita forðanum til þess að stuðla að gengisstöðugleika.
Auðveldar fyrirtækjum vöxt
Hrafn segir mjög jákvætt að opnað sé fyrir beina fjárfestingu fyrirtækja erlendis. „Það getur auðveldað þeim vöxt og opnað fyrir tækifæri á alþjóðamörkuðum. Það er mjög jákvætt og má búast við því að fyrirtækin finni fyrir þessu og að þetta liðki fyrir viðskiptum á milli landa.“
Spurður hvort hægt hafi verið að stíga stærri skref til afléttingar hafta segir Hrafn skynsamlegt að ganga hægt um gleðinnar dyr.
„Þess vegna hefur Seðlabankinn í öllum sínum aðgerðum er varðar losun fjármagnshafta stigið frekar varfærin skref. Það er ágætt að taka bara lítið skref í einu, í rétta átt, og ef vel heppnast er hægt að taka næsta skref,“ nefnir Hrafn.
Það skapi jafnframt trúverðugleika, sem sé mikilvæg forsenda í aðgerðum sem þessum.
Líta hagkerfið jákvæðari augum
Hrafn segir að áhugavert verði að fylgjast með viðbrögðum alþjóðlegu lánshæfismatsfyrirtækjanna. „Ég býst við því að þau muni líta hagkerfið jákvæðari augum ef þessi aðgerð heppnast vel, bæði skref eitt við gildistöku frumvarpsins og síðan skref tvö um áramótin.
Þannig að eftir áramót mætti búast við jákvæðum viðbrögðum frá lánshæfismatsfyrirtækjunum.“
Vannýtt alþjóðleg tækifæri í heilbrigðiskerfinu
Kristrún og Bjarni tókust hart á um efnahagsmálin
Skuldahalinn lengist í Reykjavík
Var sofandi þegar slökkvilið bar að garði
„Miklar líkur á rýmingu á næstu sólarhringum“
Mældist á 174 km hraða í gegnum vinnusvæði
Þurfa að taka myndir áður en goslokum er lýst yfir
Fylgi Höllu hrundi eftir kappræðurnar