„Það verður að segjast eins og er að það er ekki heppilegt þegar svona gerist í stjórnsýslunni en við vinnum úr þessu og höldum ótrauð áfram,“ sagði John Fenger, stjórnarformaður Thorsil ehf. í samtali við mbl.is í kjölfar úrskurðar um starfsleyfi fyrirtækisins í Helguvík.
Úrskurðarnefndin felldi úr gildi ákvörðun Umhverfisstofnunar um að veita Thorsil ehf. starfsleyfi fyrir rekstri kísilverksmiðju á iðnaðarsvæðinu í Helguvík frá því í fyrra.
Frétt mbl.is: Starfsleyfi Kísilverksmiðju fellt úr gildi
Starfsleyfið var fellt á því að frestur til að koma að athugasemdum var rangt út reiknaður að mati nefndarinnar miðað við birtingu auglýsingar í Lögbirtingablaðinu og telst fjórum dögum of stuttur.
Ekki var talið nóg að birta auglýsingu um kærufrest á heimasíðu Umhverfisstofnunar heldur miðar úrskurarnefndin við dagsetningu þar sem auglýsingin er birt á vef Lögbirtingablaðsins, það sé sú leið sem líklegust sé að komi fyrir augu sem flestra er gætu látið málið sig varða.
„Þetta er fyrst og fremst formgalli,“ sagði John. „Það var ekkert rangt við efnislegt innihald.“
Umhverfisstofnun birti tilkynningu á heimasíðu sinni í dag vegna málsins. Kemur þar fram að stofnuninni þykir atvikið miður og tafarlaust verði bætt úr verklagi. Umhverfisstofnun undirbýr nú nýja auglýsingu starfsleyfisins en úrskurðurinn tefur ferlið um nokkra mánuði.
„Umhverfisstofnun vinnur af heilindum, fólk er að gera sitt best og gerir ekki svona að gamni sínu. Enn útkoman var óheppileg og við þurfum að blæða svolítið fyrir það. Þetta gæti valdið seinkun en hefur ekki áhrif að öðru leyti. Við vorum komnir ansi langt með að klára hlutina en fyrst verðum við að fá þetta í höfn.“