„Dómurinn er ekki aðeins slæm tíðindi fyrir umbjóðanda okkar heldur fyrir viðskiptalífið í heild sinni þar sem aðilar í viðskiptum geta nú átt á hættu að þriðji aðili sem engin tengsl hefur við Ísland fari fram á að notkun auðkennis hér á landi verði hætt.“
Þetta kemur fram í tilkynningu frá lögmönnum eigenda veitingastaðarins Sushisamba í Þingholtsstræti í Reykjavík sem má ekki lengur heita Sushisamba samkvæmt dómi Hæstaréttar.
Frétt mbl.is: Má ekki heita Sushisamba
Málarekstur út af heitinu Sushisamba hefur staðið yfir frá árinu 2011. Á öllum fyrri stigum málsins hefur Sushisamba ehf. haft betur, það er að segja fyrir Einkaleyfastofu, áfrýjunarnefnd hugverkaréttinda á sviði iðnaðar og svo héraðsdómi.
Stefnandi í málinu er Samba LLC sem rekur veitingastaði í Bandaríkjunum undir sama nafni.
Sushisamba ehf. var jafnframt gert að greiða Samba LLC endurgjald upp á 1,5 milljónir króna vegna hagnýtingar merkisins.
„Það verður að teljast verulega íþyngjandi að leggja þær skyldur á aðila sem eru að velja nafn fyrir sína vöru eða þjónustu, sem einungis er ætlunin að bjóða hér á landi, að framkvæma leitir út um allan heim og ganga úr skugga um að ekki sé til staðar ruglingslega líkt vörumerki annars staðar, til að koma í veg fyrir að lenda í málarekstri sem þessum,“ segir jafnframt í tilkynningunni.
Starfsemi á veitingastaðnum Sushisamba mun ekki breytast þótt nafni staðarins verði breytt.