Seðlabanki Sýrlands hefur gefið út nýjan 2.000 punda seðil og skartar hann andliti forseta landsins, Bashar al-Assad. Þetta er í fyrsta skipti sem Assad er settur á seðil. Sýrlenska pundið hefur hrunið í verði síðustu ár vegna stríðsins í landinu.
Nýi seðilinn, sem er stærsti seðill í sögu sýrlenska pundsins, fór í umferð á nokkrum svæðum í landinu, m.a. höfuðborginni Damaskus í gær að sögn seðlabankastjórans Duraid Dergham.
Hann sagði að í ljósi þess hversu illa seðlarnir sem eru nú í umferð fannst bankanum viðeigandi að gefa út 2.000 punda seðilinn.
Á seðlinum má sjá andlit Assad einu megin en sýrlenska þingið hinu megin.
Verðmæti sýrlenska pundsins hefur hrunið í verði í kjölfar blóðugrar borgarastyrjaldar í landinu. Til að mynda hefur gengi sýrlenska pundsins gagnvart Bandaríkjadals veikst um 90% frá því að stríðið hófst í mars 2011.
2.000 sýrlensk pund jafngilda nú um fjórum Bandaríkjadölum eða um 414 íslenskum krónum.
Stærsti seðillinn í umferð í Sýrlandi hafði lengi verið þúsund punda seðill en á honum á sjá fyrrverandi forseta Sýrlands Hafez al-Assad sem var jafnframt faðir núverandi forseta.
Viðbrögð við nýja seðlinum hafa verið blendin og hafa sumir haft áhyggjur að hann muni hafa slæm efnahagsleg áhrif. Seðlabankastjórinn var þó ekki á því. „Það er engin ástæða til þess að örvænta útaf þessu,“ sagði hann við blaðamenn í Damaskus.