Fiskiðjan Bylgja í Ólafsvík hefur verið úrskurðuð gjaldþrota en fyrirtækið sagði upp 30 starfsmönnum í byrjun desember. Fiskiðjan rekur fiskverkun í Ólafsvík sem selur ferskar og frystar afurðir áfram til neytenda á erlendum mörkuðum. Þegar mest lét störfuðu 70 manns hjá fyrirtækinu.
Þetta kemur fram í auglýsingu í Lögbirtingarblaðinu. Greint var frá því í Morgunblaðinu í desember að þrjátíu starfsmönnum Fiskiðjunnar Bylgju í Ólafsvík hefði verið sagt upp störfum. Samkvæmt upplýsingum blaðsins hafði víða harðnað á dalnum hjá minni fiskvinnslufyrirtækjum árinu. Fyrst og fremst hafði gengið sett strik í reikninginn, auk þess sem sjómannaverkfall í tíu vikur um síðustu áramót hafði veruleg áhrif á afkomuna og viðskipti í sjávarútvegi.
Samkvæmt ársreikningi félagsins fyrir árið 2016 tapaði það 9,5 milljónum og 9,6 milljónum árið á undan. Skuldir þess námu rúmum 78 milljónum árið 2016. Baldvin Leifur Ívarsson er aðaleigandi fyrirtækisins á móti belgískum aðilum.