Samkeppniseftirlitið telur að úr ýmsu þurfi að bæta til þess að virk samkeppni fái betur þrifist á leigubílamarkaðinum. Að mati eftirlitsins er lagaumhverfið á margan hátt hamlandi og hefur það ítrekað mælst til þess að opinberar hömlur verði afnumdar.
Þetta kemur fram í umsögn Samkeppniseftirlitsins um þingsályktunartillögu um frelsi á leigubílamarkaði. Hanna Katrín Friðriksson þingmaður er flutningsmaður tillögunnar en hún segir fákeppni á markaðinum til þess fallna að þrýsta upp verðlagi og stuðla að skorti á þjónustu á álagstímum.
Í umsögninni er mælst til þess að fjögur ákvæði núgildandi laga verði endurskoðuð. Í fyrsta lagi ákvæðið sem takmarkar fjölda leigubíla en sú takmörkun er talin hafa augljós neikvæð áhrif á samkeppni.
„Nefna má að fjöldi leigubifreiða á höfuðborgarsvæðinu og Suðurnesjum er svipaður og þegar Samkeppniseftirlitið skrifaði álit til samgönguráðherra fyrir 11 árum síðan, þrátt fyrir mikla fólksfjölgun og sprengingu í komu ferðamanna til landsins.“
Í öðru lagi er það bannið við að veita fleiri en eitt atvinnuleyfi til hvers aðila en að mati eftirlitsins kemur það í veg fyrir að unnt sé að stofna leigubílastöðvar með því að kaupa ökutæki, afla starfsleyfis og ráða ökumenn í vinnu.
Í þriðja lagi er það áskilnaður um að akstur leigubíla sé aðalatvinna þeirra sem stunda aksturinn og í fjórða lagi stöðvaskylda leigubíla.
Undirstrikað er að þrátt fyrir öra fjölgun íslensku þjóðarinnar og mjög öra fjölgun erlendra ferðamanna til landsins hafi útgefnum leyfum til leigubílaaksturs fækkað úr 560 í 547 á nokkrum árum.
Þá kemur Samkeppniseftirlitið inn á öryggis- eftirlitshlutverk leigubílstöðva. „Eftirlitið fær þó ekki séð að með það þurfi að fara með öðrum og strangari hætti en gert er í nágrannalöndum okkar. Ekki hefur verið sýnt fram á það að mati Samkeppnieftirlitsins að hér á landi þurfi strangari aðgangskröfur til leigubílaaksturs en í nágrannalöndum í því skyni að skilja hafrana frá sauðunum í flokki leigubílstjóra með tilheyrandi samkeppnishömlum sem leiða til hærra verðs til neytenda og lakari þjónustu við þá.“