Viðskipti | mbl | 1.6.2018 | 13:32 | Uppfært 14:27

Árstekjurnar slaga í 700 milljónir

Aðilar í slitastjórnum gömlu bankanna fengu háar fjárhæðir fyrir störf sín í fyrra. mbl.is/Friðrik Tryggvason

Eins og undanfarin ár eru aðilar sem starfa fyrir slitastjórnir gömlu bankanna áberandi í samantektum yfir þá sem mestar tekjur höfðu á árinu 2017. Tveir erlendir stjórnarmenn í Glitni HoldCo, félaginu sem heldur utan um eignir Glitnis, voru með tæpar 56 milljónir á mánuði á síðasta ári, samkvæmt tekjublaði Frjálsrar verslunar.

Það eru þeir Tom Grøndahl og Steen Parsholt. Árstekjur hvors þeirra eru því tæpar 672 milljónir króna. Grøndahl er norskur en Parsholt danskur.

Þá var Richard Katz, sem situr í stjórn LBI, slitastjórn Landsbanka Íslands, með 32.730.000 kr. á mánuði samkvæmt tekjublaðinu, eða tæpar 393 milljónir króna í tekjur á árinu.

Fleiri stjórnarmenn komast á blað. Kolbeinn Árnason, stjórnarmaður LBI, er með 6.704.000 kr. á mánuði og hinn breski Mike Wheeler sem er í stjórn Glitnis HoldCo var með 5.164.000 krónur á mánuði.

Stjórnarmenn Glitnis HoldCo, þeir Mike Wheeler, Tom Grøndahl og Steen Parsholt, voru í 8., 10. og 11. sæti á lista ríkisskattstjóra yfir þá einstaklinga sem greiddu mesta skatta hér á landi í fyrra og Richard Katz var þar í 21. sæti.

Frétt af mbl.is

Þau greiddu hæstu skattana

Ársæll Hafsteinsson, lögfræðingur og framkvæmdastjóri LBI, var með 17.892.000 á mánuði árið 2017 og Snorri Arnar Viðarsson í skilanefnd Glitnis var með 16.750.000 kr. á mánuði samkvæmt tekjublaði Frjálsrar verslunar.

Þá var Ragnar Björgvinsson, lögmaður Glitnis, með 16.105.000 kr. á mánuði og Jakob Bjarnason í slitastjórn LBI var með 6.463.000 á mánuði.

Sá fyrirvari er á þessum tölum að tekjukönnun Frjálsrar verslunar byggist á álögðu útsvari eins og það birtist í álagningarskrám ríkisskattstjóra. Í einhverjum tilvikum kann að vera að skattstjóri hafi áætlað tekjur eða þá að útsvarsskyldar tekjur einstaklinga endurspegli ekki föst laun viðkomandi.