Gjaldþrotaskiptum á þrotabúi Rákungs lauk 23. maí og var niðurstaðan sú að engar eignir fengust upp í lýstar kröfur sem námu samtals 16,7 milljörðum króna.
Þetta kemur fram í Lögbirtingarblaðinu. Greint var frá því á mbl.is að líklega fyndust engar eignir í búinu og hefur sú niðurstaða nú verið staðfest. Eigendur Rákungs voru þrír lykilstarfsmenn Milestone; Guðmundur Ólason, Jóhannes Sigurðsson og Arnar Guðmundsson.
Félagið skuldar þrotabúi Glitnis milljarða vegna láns sem var veitt til kaupa á hlut í bankanum snemma árs 2008. Rákungur fékk 5,2 milljarða króna lán til kaupa á hlutabréfum í bankanum og var félagið tólfti stærsti hluthafinn í Glitni þegar bankinn féll árið 2008.