Lýstar kröfur á hendur þrotabúi eignarhaldsfélagsins Rákungs nema 16,7 milljörðum króna og stefnir í að skiptum verði lokið án þess að neinar eignir fáist upp í kröfurnar. Þetta staðfestir skiptastjóri þrotabúsins í samtali við mbl.is en samkvæmt auglýsingu í Lögbirtingarblaðinu verður skiptafundur haldinn í lok maí.
Greint var frá gjaldþroti Rákungs á mbl.is í janúar en í fréttinni voru skuldir félagsins metnar út frá skráðum skuldum í ársreikningi fyrir árið 2016.
Félagið skuldar þrotabúi Glitnis milljarða vegna láns sem var veitt til kaupa á hlut í bankanum snemma árs 2008. Rákungur fékk 5,2 milljarða króna lán til kaupa á hlutabréfum í bankanum og var félagið tólfti stærsti hluthafinn í Glitni þegar bankinn féll árið 2008. Áhættunefnd Glitnis samþykkti lánveitingu að því tilskildu að eigið fé yrði á bilinu 300 til 500 milljónir króna.
Eigendur Rákungs voru þrír lykilstarfsmenn Milestone; Guðmundur Ólason, Jóhannes Sigurðsson og Arnar Guðmundsson, að því er kemur fram í frétt DV frá árinu 2010. Nú er það í 100% eigu eignarhaldsfélagsins Glitnir HoldCo, sem var stofnað eftir að slitabú Glitnis lauk nauðasamningum í árslok 2015.