Skipta ekki rúblum eftir mánaðamót

Hægt verður að skipta rússneskum rúblum yfir í íslenskar krónur hjá Landsbankanum fram að næstu mánaðamótum. Eftir það verður hvorki hægt að kaupa rúbluseðla né skipta þeim í íslenskar krónur þar.

Þetta kemur fram í frétt á vef Landsbankans en bankinn setti í sumar upp rúbluhraðbanka í Smáralind í tilefni af heimsmeistaramótinu í knattspyrnu, sem fram fór í Rússlandi og var vel sótt af Íslendingum.

Í samtali við mbl.is segir Rúnar Pálmason, upplýsingafulltrúi Landsbankans, verkefnið hafa tekist vel til og hafa gengið betur en í fyrstu var spáð. 
„Við renndum svolítið blint í sjóinn með þetta og vissum í raun lítið um hversu mikil eftirspurn væri. Þetta var þó töluvert notað og við þurftum að fylla oftar á hraðbankann en við bjuggumst við.“

Frétt af mbl.is

Eini rúbluhraðbankinn tæmdur

Hvetur fólk til að skipta 

Aðspurður hvað þeir sem enn eiga í fórum sínum rúblur eigi að gera við þær eftir 1. nóvember bendir Rúnar á að alla jafna séu rúblur ekki fáanlegar á Íslandi og segir: „Þá verður fólk að leita annarra leiða.“

Hann segir að það hafi verið tiltölulega lítið um að fólk hafi komið og skipt rúblunum sínum á síðustu vikum og hvetur Rússlandsfara sem eiga það eftir að gera það fyrir 1. nóvember.

• Blogga um frétt