Milljarðaþrot fasteignafélags Hraðbrautar
Setja bókamerki
Tæp þrjú prósent, um 23,5 milljónir, fengust upp í almennar kröfur í þrotabú fasteignafélagsins Faxafens ehf. Félagið var í eigu hjónanna Ólafs Hauks Johnson og Borghildar Pétursdóttur og hélt utan um rekstur skólahúsnæðis framhaldsskólans Hraðbrautar, sem var til húsa að Faxafeni 10.
Kröfur í þrotabúið námu rúmlega 1,1 milljarði króna. Þar af fengust 294,3 milljónir upp í veðkröfur, en almennar kröfur námu um 830 milljónum og fengust sem fyrr segir aðeins um 23,5 milljónir upp í þær kröfur. Þá var skiptatrygging að fjárhæð 350 þúsund krónur endurgreidd að fullu. Ekkert fékkst greitt upp í eftirstæðar kröfur.
Menntaskólinn Hraðbraut tók til starfa 2003 og var Faxafen ehf. stofnað árið 2004 til að halda utan um rekstur fasteignar Hraðbrautar. Skólinn var starfræktur til ársins 2012. Á tímabilinu var meðal annars fjallað um arðgreiðslur sem hjónin greiddu sér á árunum 2005-2008.
Árið 2010 gagnrýndi Ríkisendurskoðun starfsemi skólans í skýrslu þar kemur fram að skólinn hafi fengið tæplega 200 milljónum of mikið frá ríkinu. Á sama tíma hafi eigandi skólans greitt sér 82 milljónir í arð og aðilar tengdir eiganda skólans hafi fengið 50 milljónir að láni frá skólanum.
Skólastarf lagðist niður árið 2012 en fyrir fimm árum var gerð tilraun til að endurvekja skólann sem gekk ekki eftir. Einungis 30 nemendur höfðu skráð sig til náms við skólann, í samanburði við rúmlega 200 sem sóttu nám þegar best lét. Skólagjöldin voru 890 þúsund krónur fyrir heilt ár. Stúdentspróf hefði því kostað 1.780 þúsund krónur.
„Það er verið að slátra íslenskum heimilum“
„Aðför að samfélaginu í heild sinni“
Samningurinn samræmi bæði vinnuskil og vinnutíma
Erfiðar viðræður að baki
Kerfið streitist á móti
„4-5% gólf sem við verðum bara að brjótast í gegnum“
Spá launahækkunum nokkuð umfram kjarasamninga