Hörð gagnrýni á Hraðbraut

Menntaskólinn Hraðbraut hefur starfað í nokkur ár - myndin tengist …
Menntaskólinn Hraðbraut hefur starfað í nokkur ár - myndin tengist fréttinni ekki á annan hátt en þetta er frá útskrift stúdenta frá skólanum mbl.is/Jim Smart

Ríkisendurskoðun gagnrýnir starfsemi menntaskólans Hraðbrautar harðlega í nýrri skýrslu. Þar kemur fram að skólinn hafi fengið tæplega 200 milljónum of mikið frá ríkinu. Á sama tíma hafi eigandi skólans greitt sér 82 milljónir í arð og aðilar tengdir eiganda skólans hafi fengið 50 milljónir að láni frá skólanum. Að mati Ríkisendurskoðunar eru þessar lánveitingar óeðlilegar enda tengjast þær ekki rekstri skólans.

Í júní sl. bað mennta- og menningarmálaráðuneytið Ríkisendurskoðun um að kanna framkvæmd þjónustusamnings ráðuneytisins við Hraðbraut ehf. sem rekur Menntaskólann Hraðbraut.

Í nýrri greinargerð Ríkisendurskoðunar kemur fram að á tímabilinu 2003–2009 reyndust nemendur skólans um fimmtungi færri en áætlanir samningsins gerðu ráð fyrir. Framlög ríkisins voru hins vegar miðuð við þessar áætlanir og fékk skólinn samtals 192 milljónir króna umfram það sem honum bar á tímabilinu.

Fékk 82 milljónir í arð en í raun hafði skólinn ekki bolmagn til þess að greiða arð

Fram kemur að á tímabilinu hafi arðgreiðslur skólans til eigenda hans numið samtals 82 milljónir króna. Ríkisendurskoðun telur að skólinn hafi í raun ekki haft fjárhagslegt bolmagn til að greiða þennan arð.

Þá kemur fram að lán skólans til aðila tengdra eigendum hans hafi numið samtals 50 m.kr. í árslok 2009. Að mati Ríkisendurskoðunar eru þessar lánveitingar óeðlilegar enda tengjast þær ekki rekstri skólans. Stofnunin telur óvíst að fjárhagslegar forsendur séu fyrir áframhaldandi rekstri hans.

Gefur eftir skuld en hefur ekki heimild til þess

Mennta- og menningarmálaráðuneytið mun ekki fara fram á að skólinn endurgreiði ofgreidd framlög á tímabilinu 2004–2006 en þau nema rúmlega 126 milljónum króna.

„Að mati Ríkisendurskoðunar hefur ráðuneytið ekki heimild til að gefa eftir þessa skuld. Þess má geta að á umræddu tímabili nam hagnaður skólans um 57 m.kr. og arðgreiðslur til eigenda um 24 m.kr. Lán skólans til aðila tengdra eigendum hans námu 16 m.kr. í árslok 2006.

Samkvæmt skýru ákvæði í þjónustusamningnum skal árlega fara fram uppgjör þar sem áætlun um nemendafjölda og framlög er borin saman við rauntölur.

Í greinargerðinni segir að slíkt uppgjör hafi aldrei farið fram og er það gagnrýnt. Að lokum skal þess getið að úttekt Ríkisendurskoðunar náði eingöngu til fjárhagslegra þátta og ekki til faglegs starfs Hraðbrautar," segir í tilkynningu frá Ríkisendurskoðun.

Ólafur Haukur Johnson, skólastjóri Menntaskólans Hraðbrautar, er aðaleigandi skólans.

Umfjöllun mbl.is um skólann í sumar

Ólafur Haukur Johnson, skólastjóri Hraðbrautar.
Ólafur Haukur Johnson, skólastjóri Hraðbrautar. mbl.is/Eggert
mbl.is

Bloggað um fréttina