Ríkið tekur til sín 94,1% af útsöluverði vodkaflösku í verslunum ÁTRV og 54,1% af verði bjórdósar. Þetta sýna útreikningar Félags atvinnurekenda sem byggjast á fjárlagafrumvarpi næsta árs, en það var kynnt í gær.
Mestu munar um áfengisgjöld, en því til viðbótar er virðisaukaskattur lagður á áfengi auk þess sem ÁTVR leggur á vörur til að mæta kostnaði við dreifingu.
Í fjárlagafrumvarpi næsta árs er lagt til að áfengisgjöld verði hækkuð um 2,5%. Sú hækkun er þó undir ársverðbólgu, sem er 3,2%, og mun því hlutur ríkisins í verði áfengis fara lækkandi milli ára, nema heildsöluverð frá birgja hækki minna en sem því nemur á árinu, en er þó eftir því æði hátt.
„Hæstu áfengisskattar Evrópu hækka,“ segir í tilkynningu frá félaginu.
Gefin eru fjögur dæmi um þriggja lítra kassa af kassavíni, 750 millilítra léttvínsflösku, eins lítra vodkaflösku og 500 ml bjórdós. Í hverjum flokki er miðað við meðalverð og meðalstyrkleika allra vörutegunda sem eru til sölu í ríkinu.
Áfengisgjald er greitt af hverjum sentilítra hreins áfengis umfram 2,25% af rúmmáli. Krónutalan ræðst þó einnig af tegund drykkjar og verður eftir breytingu 128,79 krónur af bjór, 117,31 króna af áfengjum drykkjum undir 15% að styrk, 158,77 krónur af öðru áfengi.