Ólafur F. handleggsbrotnaði í slagsmálum við vin sinn

Í Monitor, sem kom út í morgun, svara oddvitarnir í Reykjavík því hvort þeir hafi einhvern tímann lent í slagsmálum. Flestir eiga þeir sameiginlegt að hafa lent í einhverjum líkamlegum átökum á sínum yngri árum. Dagur B. Eggertsson var laminn fyrsta daginn sinn í Árbæjarskóla, Sóley Tómasdóttir slóst við systur sínar og Ólafur F. Magnússon handleggsbrotnaði í slagsmálum við góðan vin sinn.

Hér að neðan má sjá svör borgarstjóraefnanna við spurningunni: Hefur þú lent í slagsmálum?

Einar Skúlason, Framsóknarflokkurinn
„Ekkert meira en bara pústrar. Ég hef lent verst í því þegar ég hef verið að stilla til friðar. Ég meiddist einu sinni töluvert í Þórsmörk þegar ég ætlaði að stoppa menn af.“

Hanna Birna Kristjánsdóttir, Sjálfstæðisflokkurinn
„Nei.“

Baldvin Jónsson, Reykjavíkurframboð
„Já, margoft hér áður fyrr.“

Helga Þórðardóttir, Frjálslyndi flokkurinn
„Ég er búin að vera atvinnumótmælandi síðan hrunið varð, þannig að það er einna helst þegar manni hefur verið ýtt til á Austurvelli.“

Ólafur F. Magnússon, Framboð um heiðarleika
„Þau slagsmál sem eru mér minnisstæðust voru við góðan vin minn, en mér var hegnt rækilega fyrir því ég handleggsbrotnaði.“

Dagur B. Eggertsson, Samfylkingin
„Já, ég var laminn fyrsta daginn í Árbæjarskóla.“

Sóley Tómasdóttir, Vinstri græn
„Já, sennilega helst við systur mínar í æsku.“

Jón Gnarr, Besti flokkurinn
„Ég hef verið sleginn en aldrei slegið til baka.“

Nánar í nýjasta Monitor. Blaðið má lesa í rafrænni útgáfu hér.