Íslandsvinir ársins 2015
Setja bókamerki
Íslendingar hafa alltaf gaman af því þegar að erlendar stórstjörnur ákveða að sækja litla skerið okkar heim. Vekur það yfirleitt mikla athygli meðal landsmanna og fjölmiðla. mbl.is hefur tekið saman nokkra af áhugaverðustu Íslandsvinum ársins 2015.
Poppstjarna spókaði sig á Suðurlandinu
Að sjálfsögðu er byrjað á sjálfum Justin Bieber sem kom hingað til lands 21. september. Fregnir af poppstjörnunni að spóka sig í Reykjanesbæ dreifðust um samfélagsmiðla og fljótlega voru fjölmiðlar komnir í spilið. Bieber fékk sér að borða á veitingastaðnum Lemon en lagði einnig leið sína á Subway í Njarðvík. Þar að auki fékk hann sér tvöfaldan cappuccino á kaffihúsi Kaffitárs.
Frá Reykjanesbæ hélt Bieber og fylgdarlið hans för sinni áfram og sást til söngvarans á Selfossi þar sem hann nýtti sér salerni á bensínsstöð. Einnig skellti Bieber sér til Vestmannaeyja í sjálfum Herjólfi og sagði Elliði Vignisson, bæjarstjóri Vestmannaeyja, að bæjarfélagið hafi haft gaman af komu stjörnunnar. Bieber kom á sama tíma og mörg börn leita pysja í Vestmannaeyjum og hafði Elliði heyrt af dæmum þar sem krakkar þóttust vera að leita að pysjum en voru síðan í raun að leita að Bieber.
„Ég heyrði líka af því að barnaafmæli hafi tæmst og hópar barna og unglinga hafi safnast saman til að taka á móti Herjólfi til að sjá hvort að Bieber hafi verið á meðal gesta,“ segir Elliði en hann heyrði af því að Bieber hafi komið til Eyja með Herjólfi í gegnum Landeyjahöfn.
Fyrri frétt mbl.is: Barnaafmæli tæmdust vegna Bieber
Bieber fór af landi brott 23. september eftir viðburðarríka daga. Nokkrum vikum var síðan staðfest að Bieber hefði tekið upp myndband hér á landi en það var grunur margra. 2. nóvember var myndbandið við lagið I‘ll Show You frumsýnt og telst það hin besta landkynning. Starfsmönnum ferðaþjónustu hér á landi fannst þó ástæða til þess að vara við því að fólk geri eins og Bieber í myndbandinu þar sem hann veður út í ískalt Jökulsárlónið. Myndbandið vakti þó óneitanlega lukku og á tveimur dögum var búið að horfa 8,6 milljón sinnum á það á Youtube.
Fyrri frétt mbl.is: Ólaunuð Íslandskynning hjá Bieber
Ef marka má samfélagsmiðlasíður Bieber líkaði honum dvölin hér á landi vel og kemur hann hingað aftur á næsta ári, en þá til að halda tónleika. 19.000 miðar á tónleika Bieber í Kórnum 9. september næstkomandi seldust upp á mettíma og nú er verið að skoða hvort að söngvarinn geti haldið aukatónleika þar sem augljóst er að eftirspurnin er mun meiri en framboðið.
Borðaði á Grillmarkaðinum og kúkaði í snjóinn
Annar hjartaknúsari kom hingað til lands á árinu en það var Hollywood leikarinn Channing Tatum. Var hann hér í fríi, m.a. til að skoða jökla, eins og hann sagði aðdáendum á Keflavíkurflugvelli.
Fyrri frétt mbl.is: Channing Tatum stoppaður í Leifstöð
Það er óhætt að segja að æsingur hafi gripið um sig þegar að aðdáendur kappans heyrðu af veru hans hér á landi og voru ferðir hans í Reykjavík vel skrásettar á samfélagsmiðlum. M.a. náðist mynd af honum snæða á Grillmarkaðinum eitt hádegið. Náðust einnig myndir af leikaranum á veitingastaðnum Snaps með rapparanum Gísla Pálma.
Eftir stutt stopp í borginni hélt Tatum svo áfram för sinni, með leikaranum Adam Rodriguez og fríðu föruneyti, áleiðis að Vatnajökli. Lenti hópurinn m.a. í snjóbyl og var ferðinni vel lýst á Instagram síðu Rodriguez.
Nokkrum vikum síðar viðurkenndi Tatum í bandarískum spjallþætti að hafa kúkað í snjóinn þegar hann var á Vatnajökli. Tatum sagði kúkinn hafa frosið áður en hann lenti á jörðinni. „Hann á eftir að liggja þarna að eilífu því að hann er frosinn. Það væri hægt að gera Jurassic heim úr kúkinum mínum.“
Skellti sér til Eyja og Hornvíkur
27. júlí greindu Eyjafréttir frá því að milljarðarmæringurinn og stofnandi Microsoft, Bill Gates væri staddur í Vestmannaeyjum. Fór hann m.a. í siglingu með Stóra Erni, skemmtibát Rib Safari en Gates kom til eyjunnar með þyrlu. Þar tók hópur lífvarða á móti þeim.
Var haldið niður að bryggju og um borð í Stóra Örn. Sigldi hann umhverfis eyjarnar, meðal annars í Æðarhelli. Komu þau svo í land og skoðuðu bæinn.
Síðar var sagt frá því á vefsíðu Bæjarins bestu að Gates hafi farið til Hornvíkur. Flytja átti hann með þyrlu í Hornvík en ekki fékkst leyfi fyrir lendingu og því var lent í Furufirði, utan friðlands, og var Gates fluttur með báti þaðan til Hornvíkur þar sem hann gekk upp á bjarg.
Þá segir að þeir sem komu að ferðinni hafi verið gert að skrifa undir yfirlýsingu um þagnarskyldu.
Svartar strendur og stórbrotið landslag
Í lok sumars kom „Bollywood kóngurinn“ Shah Rukh Khan til landsins til að taka upp myndband við nýtt lag sem hljómar í myndinni Dilwale. Khan deildi mynd á Twitter-síðu sinni af Álverinu í Straumsvík og greindi frá komu sinni.
Fyrri frétt mbl.is: Íslensk náttúra nýtur sín í Bollywood
Shah Rukh Khan er fæddur þann 2. nóvember 1965. Hann er einn af ríkustu leikurum heims og er auður hans metinn á um 80 milljarða króna. Hann var staddur hér á landi með mótleikkonu sinni Kajol og voru þau ásamt föruneyti hér í tæpar tvær vikur.
Myndbandið sem má sjá hér að neðan er tekið upp á svörtum ströndum Íslands með stórbrotið landslagið allt í kring. Danshöfundurinn Farah Khan kemur að gerð myndbandsins ásamt þeim Khan og Kajol.
Fjallabak, Sprengisandur og niður í Eyjafjörð
Bregðast við vopnahléstillögu á morgun
Mál hjúkrunarfræðingsins fer aftur fyrir héraðsdóm
Breytingar á skipulagi fréttadeildar RÚV
Laugavegur hjólaferðamannsins að fæðast
Sennilega gróðureldur, ekki ný sprunga
Norskur lögreglumaður dæmdur
Ók á ofsahraða á móti umferð og uppi á stétt