Skrúfað fyrir styrki til Gullinnar dögunar

Gríski hægriöfgaflokkurinn Gullin dögun mun ekki lengur hljóta opinbera styrki eftir að gríska þingið samþykkti með yfirgnæfandi meirihluta atkvæða að stöðva opinber framlög til flokksins.

Samkvæmt nýrri grískri löggjöf geta stjórnvöld fryst framlög ótímabundið til flokka sem eru undir stjórn einstaklinga sem tengjast glæpasamtökum eða hryðjuverkastarfsemi. 

Leiðtogi Gullinnar dögunar og tveir þingmenn flokksins eru nú í haldi lögreglu og bíða þeir nú eftir að réttarhöld hefjist í málum þeirra, en þremenningarnir eru ákærðir fyrir að tengjast glæpasamtökum. 

Þeir voru handteknir eftir að tónlistarmaður, sem barðist gegn fasisma í heimalandinu, var myrtur, en talið er að stuðningsmaður Gullinnar dögunar hafi ráðið manninum bana. Talsmenn flokksins hafa hins vegar vísað ásökunum á bug. 

Morðið, sem var framið í síðasta mánuði, varð til þess að almenningur krafðist þess að flokkurinn yrði alfarið bannaður. 

• 1 blogg um fréttina

Bloggað um fréttina

• Wilhelm Emilsson: Vinsæll flokkur