Erlent | AFP | 2.12.2015 | 20:04 | Uppfært 3.12.2015 6:35

Allt að tólf látnir í Kaliforníu

Mynd 1 af 7 Sjúkraliði hleypur með fórnarlamb á sjúkrabörum. AFP

Mynd 2 af 7 AFP

Mynd 3 af 7 San Bernardino er í um 95 km fjarlægð frá Los Angeles. Google Maps

Mynd 4 af 7 AFP

Mynd 5 af 7 AFP

Mynd 6 af 7 AFP

Mynd 7 af 7 AFP

Lögregla leitar nú grunaðra í tengslum við skotárás í San Bernardino í Kaliforníuríki Bandaríkjanna. Að minnsta kosti 20 manns hafa verið skotnir en slökkvilið borgarinnar greindi frá þessu á Twitter. Að sögn lögreglu gengur byssumaðurinn eða byssumennirnir lausir og er allt að þriggja leitað.

Samkvæmt frétt CNN varð árásin framin í húsnæði Inland Regional Center, sem er þjónustumiðstöð fyrir fólk með þroskaskerðingu. Á Facebook-síðu Inland Regional Center kemur fram að 670 starfi fyrir fyrirtækið í San Bernardino og þjónusti rúmlega 30.200 manns á svæðinu.

Uppfært 20:24

Í frétt ABC kemur fram að allt að tólf manns hafi látið lífið í árásinni. Að sögn vitna er um þrjá árásarmenn að ræða. Þeir voru allir með lambhúshettur, vopnaðir rifflum. Enginn hefur verið handtekinn. Önnur vitni halda því fram að þeir grunuðu hafi flúið staðinn í svörtum jeppa.

Samkvæmt frétt NBC eru tugir sérsveitamanna fyrir utan bygginguna en lögregla vinnur nú að því að rýma hús í nágrenninu. FBI fulltrúar eru jafnframt á leiðinni á staðinn. Fyrstu skotin heyrðust um klukkan 11 að staðartíma í byggingunni eða um klukkan 19 að íslenskum tíma.

Sprengjuleitarsveit er á svæðinu og á að hafa fundið grunsamlegan pakka á annarri hæð hússins. Sprengjuvélmenni verður notað til þess að rannsaka pakkann.

Hér að neðan má sjá fréttamann The Today Show lýsa aðstæðum.