Flugvélin sem hrapaði í Kólumbíu með brasilískt knattspyrnulið um borð varð eldsneytislaus, samkvæmt hljóðritun sem hefur verið lekið til fjölmiðla.
Í upptöku flugumferðarstjórnar heyrist flugstjórinn óska ítrekað eftir lendingarleyfi vegna „algjörrar rafmagnsbilunar“ og skorts á eldsneyti, að því er BBC greindi frá.
Aðeins sex af þeim 77 sem voru um borð í vélinni komust lífs af.
Áður hafði verið talið að skortur á eldsneyti hefði átt þátt í slysinu. Rannsókn á tildrögum slyssins er í fullum gangi.
AFP-fréttastofan greinir frá því að flugvélin hafi ekki stoppað til að fá eldsneyti eins og hún ætlaði að gera.
„Flugvélin átti að fá eldsneyti í Bogota,“ sagði Gustavo Vargas hjá flugfélaginu LAMIA. Þess í stað flaug vélin framhjá kólumbísku höfuðborginni í átt að Medellín. Slysið varð í fjalllendi fyrir utan borgina.