Blaðafulltrúi Hvíta hússins gerði lítið úr tengslum Donalds Trump Bandaríkjaforseta við fyrrverandi kosningastjóra hans, Paul Manafort, á blaðamannafundi. Mikið hefur verið fjallað um meint tengsl hans við Rússa.
Að sögn Sean Spicer, blaðafulltrúa Hvíta hússins, lék Manafort „mjög takmarkað hlutverk í mjög takmarkaðan tíma“.
Manafort stjórnaði kosningabaráttu Trump á síðasta ári er hann sóttist eftir því að verða forsetaefni Repúblikanaflokksins.
Manafort hóf störf í mars og sagði upp í ágúst eftir að hafa hjálpað til við að tryggja Trump tilnefninguna.
Kosningastjórinn fyrrverandi er einn þó nokkurra aðstoðarmanna Trump sem hafa verið sakaðir um samskipti við Rússa meðan á kosningabaráttunni stóð.
Bandaríska alríkislögreglan, FBI, rannsakar hvort Rússar hafi skipt sér af kosningunum í fyrra og einnig hvort Rússar hafi mögulega verið í leynimakki með Trump og aðstoðarmönnum hans.