Ísland biður Norðurlöndin um aðstoð
Geir H. Haarde kemur til blaðamannafundar í Helsinki í dag. norden.org/Johannes Jansson
Íslensk stjórnvöld hafa óskað eftir því með formlegum hætti við Norðurlöndin, þ.e. Danmörk, Svíþjóð, Noreg og Finnland, að þau veiti Íslendingum lán. Frá þessu greindi Geir H. Haarde forsætisráðherra, á blaðamannafundi eftir fund forsætisráðherra landanna í Finnlandi í dag.
„Við höfum lagt fram beiðni um lán hjá öllum norrænu [seðla]bönkunum,“ sagði Geir á blaðamannafundi í Helsinki í dag. Þar funduðu forsætisráðherrar Norðurlandanna fimm um fjármálakreppuna, en þeir eru nú staddir í Finnlandi vegna Norðurlandaráðstefnunnar sem hófst í dag.
„Ég er ekki reiðubúinn að greina í smáatriðum frá því sem við höfum óskað eftir,“ segir Geir.
Á blaðamannafundinum skýrði Geir frá því hvaða erfiðleikum Íslendingar standi nú frammi vegna fjármálakreppunnar.
Geir mun hitta starfsbræður sína síðar í dag til að ræða mögulegan björgunarpakka.
„Allir starfsbræður mínir hafa lýst yfir vináttu og stuðningi, auk þess hafa þeir sýnt fram á að þeir eru reiðubúnir að aðstoða Ísland,“ sagði Geir.
Geir benti á möguleika þess að sameina lán Alþjóðagjaldeyrissjóðsins við aðstoð Norðurlandanna, og mögulega við hið umdeilda Rússalán. Geir lagði hins vegar áherslu á að enn eigi eftir að ganga frá nokkrum samkomulagsatriðum.
Þá sagði Geir að hann ætti von á frekari viðræðum við norrænu forsætisráðherrana í dag og að hann vonaði að sá vandi sem hafi skapast vegna fjármálakreppunnar verði fyrsta skrefið að því að samstarf Norðurlandanna muni aukast enn frekar.
