Viðskiptaþvinganir enn á borðinu
Hjörtur J. Guðmundsson
Setja bókamerki
„Sá möguleiki að beita viðskiptaþvingunum er vitanlega enn á borðinu,“ sagði Maria Damanaki, sjávarútvegsstjóri Evrópusambandsins, í umræðum í Evrópuþinginu síðastliðinn mánudag og vísaði þar til þvingana gegn Íslendingum og Færeyingum vegna makríldeilunnar. Hins vegar væri mikilvægt að farið yrði vandlega yfir þær lagalegu forsendur sem þyrfti að uppfylla vegna slíkra aðgerða og tímasetningu þeirra.
„Við erum að ræða allar mögulegar leiðir vegna makrílsins við aðildarríkin. Í næstu viku funda ég með norska [sjávarútvegs-]ráðherranum með það fyrir augum að komast að niðurstöðu,“ sagði hún ennfremur samkvæmt fréttavefnum Fishnews.eu í gær og bætti við að þegar hefði verið farið yfir það hvernig slíkar viðskiptaþvinganir yrðu framkvæmdar í því skyni að flýta fyrir ákvörðunartöku ef til þess kæmi að gripið yrði til slíkra aðgerða.
Damanaki sagði að framkvæmdastjórn Evrópusambandsins fylgdist náið með málinu og að verið væri að skoða ýmsa möguleika í stöðunni. Enginn möguleiki hefði verið útilokaður í því sambandi enn sem komið væri. „Við munum halda áfram að beita öllum mögulegum leiðum til þess að setja pólitískan þrýsting á Ísland og Færeyjar ásamt samstarfsmönnum okkar í Noregi.“
Útlendingafrumvarpið á dagskrá á morgun
„Bíð bara eftir að það fari að gjósa aftur“
„Mjög miður að af þessu hljótist kostnaður“
Þakklátur Kínverjum fyrir friðarumleitanir
„Hann var lokaður inni í bátnum“
Kemur ekki til greina að semja við ESB
Baldur: Það má ekki gelda embættið