Tveir erlendir karlmenn, sem grunaðir eru um umfangsmikinn þjófnað hér á landi, verða áfram í gæsluvarðhaldi á grundvelli rannsóknarhagsmuna fram á þriðjudag í næstu viku. Mennirnir voru fyrst úrskurðaðir í gæsluvarðhald fimmtudaginn 2. júní og hafa sætt einangrun allan tímann.
Yfirheyrslur hafa farið fram síðustu daga. Þýfið er metið á margar milljónir en meðal þess eru snyrtivörur, skartgripir, dýr fatnaður, raftæki og veiðivörur. Hluti þýfisins hefur verið sendur úr landi með pósti. Verið er að vinna í því að fá hingað til lands fimm sendingar sem taldar eru tengjast mönnunum og innihalda þýfi.
Ekki hafa fleiri verið handteknir vegna málsins. Rannsókn lögreglu er nokkuð umfangsmikil en meðal annars þarf að kanna hvort mennirnir séu þeir sem þeir segjast vera, þ.e. að upplýsingar á skilríkjum sem þeir höfðu meðferðis séu réttar.
Lögreglan á höfuðborgarsvæðinu hefur meðal annars verið í samstarfi við Interpol, Europol og erlend lögregluyfirvöld við rannsókn málsins.