Uppboð fyrir Ágústu Örnu Sigurdórsdóttur, sem lamaðist fyrir neðan brjóst í slysi á Selfossi í síðasta mánuði, gengur vel.
„Ég er mjög spennt fyrir styrktarkvöldinu og alveg ofsalega þakklát fyrir stuðninginn. Ég er eiginlega orðlaus yfir öllum þessum hlýhug,“ segir Ágústa Arna í samtali við mbl.is.
Ágústa Arna lamaðist þegar hún féll niður um op á neyðarútgangi á Selfossi í lok ágúst. Hún féll 6,3 metra og þykir kraftaverk að hún hafi lifað fallið. Hún höfuðkúpubrotnaði, kinnbeinsbrotnaði og hryggbrotnaði. Ágústa er lömuð frá brjósti eftir slysið.
Hún segir að það komi bersýnilega í ljós hvað hún eigi marga góða að. „Það gerir það greinilega.“
Uppboð hófst fyrir tveimur vikum, styrktarreikningur var opnaður og sérstakt styrktarkvöld verður haldið á Hótel Selfossi 6. október. Fjölmargir hlutir eru í boðinu í uppboðinu, sem má sjá hér.
Um tíu vinir og ættingjar Ágústu standa á bak við uppboðið og styrktarkvöldið en uppboðið stendur fram að styrktarkvöldinu. Hægt er að taka þátt í uppboðinu með því að senda tölvupóst á styrktarkvöld@gmail.com.
Númer styrktarreikningsins er 0325-13-110203 og kennitalan 270486-3209. Reikningurinn er hjá Arion banka og verður Róbert Sverrisson, viðskiptafræðingur hjá bankanum, fjármálastjóri söfnunarinnar.
Selfyssingarnir, og landsliðsmennirnir í knattspyrnu, Jón Daði Böðvarsson og Viðar Örn Kjartansson hafa til að mynda gefið treyjur sem þeir hafa leikið í. „Þessi treyja verður í boði í uppboðinu. Þetta er treyjan sem ég spilaði í leik á móti Zenit frá Rússlandi á dögunum í Evrópukeppninni. Hvet alla til að taka þátt og hjálpa Ágústu Örnu. Þegar uppboðinu lýkur þá heiti ég því að tvöfalda þá upphæð,“ skrifaði Viðar Örn á vegg uppboðsins á Facebook.
Einnig er hægt að bjóða í áritaða treyju frá Aroni Pálmarssyni, landsliðsmanni í handbolta. Auk þess er hægt að bjóða í ýmsar ferðir og málverk.
Fyrri fréttir mbl.is: