„Ég er nokkuð viss um að það er mjög mismunandi ónæmissvarið við bóluefnum almennt. Sú fjölbreytni liggur meira í manneskjunni sem er bólusett heldur en í bóluefninu sem er notað,“ segir Kári Stefánsson, forstjóri Íslenskrar erfðagreiningar í samtali við mbl.is. 

Greint var frá því á mbl.is í gær að talsverður fjöldi fólks sæk­ir í mót­efna­mæl­ingu hjá rann­sókn­ar­stofu Sam­eind­ar eft­ir Covid-19 bólu­setn­ingu til þess að full­vissa sig um að það hafi myndað mót­efni gegn Covid-19.

Yf­ir­leitt mæl­ist nóg af mót­efni eft­ir bólu­setn­ingu en í sum­um til­vik­um mæl­ist fólk ekki með nægi­lega góða mót­efna­svör­un. Kári segir þetta frekar stafa af fjölbreytileika mannsins heldur en bólefna. 

Hluti af mannlegri fjölbreytni 

„Það er ósköp einfaldlega hluti af mannlegri fjölbreytni að bregðast mismunandi við mótefnum sem finnast í okkar umhverfi.“

Hann segir Íslenska erfðagreiningu ekki rannsaka styrkleika ónæmissvara eftir bólusetningu. 

„Ónæmissvarið er í tveimur megin þáttum þannig að annars vegar myndast mótefni, þar eru eggjahvítuefni sem bindast við allskonar hluta veirunnar. Þegar við sýkjumst  eða erum bólusett myndast gjarnan mótefni gegn fleiru heldur en því sem mestu máli skiptir.

Það sem skiptir máli gagnvart þessari veiru er að það myndist mótefni gegn svokölluðu S-eggjahvítuefni sem binst við frumuna og reyni að komast inn í hana. Við göngum út frá því sem vísu að þau mótefni verji.

Síðan er svokallað frumubundið ónæmi. Þá eru hvítar blóðfrumur, lymphocyte eins og það kallast á útlensku, sem drepa þær frumur sem eru sýktar,“ útskýrir Kári. 

Hann segir Íslenska erfðagreiningu hafa rannsakað bæði mótefnasvarið og frumubundna ónæmið gegn sýkingunni sjálfri. En ekki rannsakað kerfisbundið ónæmissvör í þeim sem eru bólusettir.

Veikasta fólkið með sterkasta ónæmið

„Við erum margvísleg. Hvert einstakt eintak af mannskepnunni er alveg sérstakt og ekkert okkar er alveg eins. Það á ekki bara við um útlit heldur á það líka við um ónæmissvar.

Við erum með mjög misjafnt ónæmissvar og kraftur ónæmissvarsins fylgir normaldreifingu. Þannig að sumir bregðast við mótefnum með því að mynda kraftmikið ónæmissvar, aðrir tiltölulega slakt ónæmissvar. Það endurspeglar viðbrögðin við bólusetningu,“ segir Kári. 

Hann segir sömuleiðis að þeir sem mest hafa veikst séu með kraftmesta ónæmissvarið. „Covid-19 er nokkurs konar sjálfsónæmissjúkdómur sem veiran kemur af stað.“

Karlar kvartsárari 

Kári segir þó ekki endilega hægt að horfa í það hversu veikt fólk varð eftir bólusetningu.

„Það er tvennt sem kemur til. Við bregðumst mismunandi hart við svona bóluefni og svo eru menn mismunandi kvartsárir. Eitt er alveg ljóst; þeir sem verða lasnastir eru karlmenn. Því þeir eru miklu kvartsárari en konur.“

Tengdar fréttir

Bólusetningar við Covid-19

„Það þarf að vinna mikinn fjölda upp“

• WHO: Bóluefni bjargað 1,4 milljónum mannslífa
• Bætur ef tjón verður af völdum bólusetningar
• „Flestar þessara aðgerða standast skoðun“
• Ósennilegt að bólusetning orsaki tíðavandamál

» Fleiri tengdar fréttir

• 1 blogg um fréttina

Bloggað um fréttina

• Þórdís Björk Sigurþórsdóttir: Ekkert ónæmi mældist hjá þessum eftir bólusetningu!