Gasrisinn Júpíter á von á agnarsmáum gesti frá plánetunni jörð á mánudaginn þegar bandaríska geimfarið Juno kemst á braut um reikistjörnuna. Juno, sem er nefnt eftir konu Júpíters í rómverskri goðafræði, er ætlað að skyggnast undir skýjahulu plánetunnar og afhjúpa leyndarmál hennar.
Eftir fimm ára og tæplega þriggja milljarða kílómetra ferðalag í gegnum sólkerfið á Juno að komast á braut um Júpíter á mánudag. Hafi allt gengið að óskum á merki frá geimfarinu að berast til jarðar kl. 16:53 að íslenskum tíma.
Áður þarf að ræsa aðalhreyfil Juno til að hægja á könnunarfarinu um rúmlega 1.900 km/klst til að Júpíter geti „gripið“ það með þyngdarkrafti sínum. Það tekur útvarpsmerki heilar 48 mínútur að ferðast á milli geimfarsins og stjórnstöðvar NASA í Kaliforníu jafnvel þó að það ferðist á hraða ljóssins. Ef eitthvað fer úrskeiðis við brunann verður því ekkert sem nokkur getur gert til að bjarga því.
Að því gefnu að allt gangi eftir mun Juno ganga 37 hringi á braut um Júpíter yfir norður- og suðurpól reikistjörnunnar næstu tuttugu mánuðina. Brautin verður afar sporöskjulaga. Fjærsti punktur sporbrautarinnar færir Juno rúmlega þrjár milljónir kílómetra frá reikistjörnunni en næst fer það í rétt tæplega 5.000 kílómetra fjarlægð frá yfirborðinu.
„Eitt aðalmarkmið Juno er að komast að uppskriftinni að sólkerfum. Hvernig býr maður til sólkerfi? Hvernig býr maður til reikistjörnunnar í sólkerfinu okkar?“ segir Scott Bolton, aðalvísindamaður leiðangursins.
Á meðal þess sem geimfarið, sem verður það fyrsta til að vera braut um Júpíter í átta ár, á að kanna er hversu djúpt stóri rauði bletturinn, helsta einkenni reikistjörnunnar, nær niður í lofthjúpinn og hvernig innviðir hennar eru.
„Við vitum raunverulega ekki hvort það sé kjarni í miðju Júpíters. Ef hann er til staðar segir það okkur svolítið hvenær, hvernig og örlítið um hvar Júpíter hlýtur að hafa myndast,“ segir Scott Bolton, aðalvísindamaður Juno-leiðangursins.
Þá á Juno að gera athuganir á gríðarlega öflugu segulsviði þessarar langstærstu reikistjörnu sólkerfisins og eins er farið búið innrauðri myndavél til að rannsaka segulljós í kringum pólana.
Hefðbundin myndavél er einnig um borð í Juno og gefst almenningi kostur á að senda tillögur að því hvert skuli beina henni.