Sérkennilegt hjá borginni

„Nú er kominn tími til að velta við hverjum steini og fara ofan í saumana á þessu máli og komast að því af hverju borgin afsalar sér þessum miklu verðmætum,“ segir Hildur Björnsdóttir, oddviti Sjálfstæðisflokksins í Reykjavík, um samninga sem borgin gerði við olíufélögin um uppbyggingarreiti.

Frétt af mbl.is

Borgin segir rangfærslur í umfjöllun Kastljóss

Meirihluti borgarráðs samþykkti í gær tillögu sjálfstæðismanna um að innri endurskoðun kanni samningana. Kveðst Hildur fagna því enda hafi minnihlutinn áður lagt það til árið 2021, en tillögunni var vísað frá.

Frétt af mbl.is

Innri endurskoðun gerir úttekt á máli olíufélaganna

Reykjavíkurborg sendi í gær frá sér yfirlýsingu þar sem fullyrt var að rangfærslur hefðu verið í umfjöllun Kastljóss um samningana. Hildur segist afar ósammála mörgu í yfirlýsingunni. Til að mynda sé sérkennilegt að borgin segi íbúðafjölda oftalinn í umfjölluninni, enda hafi verið vísað til tilkynningar frá borginni sjálfri um samningana árið 2021, þar sem sagði að reisa ætti 700-800 íbúðir.

Hildur Björnsdóttir. mbl.is/Eggert Jóhannesson

Spurð um þá fullyrðingu borgarinnar að samningarnir hefðu ekki verið kynntir í sumarleyfi segir Hildur borgarstjórn vissulega hafa verið í leyfi og málið því ekki tekið fyrir á opnum fundi borgarstjórnar heldur á lokuðum fundi borgarráðs. Aðeins sjö eiga þar sæti en 23 skipa borgarstjórn.

Hildur víkur einnig að fullyrðingum borgarinnar um að þurft hafi að bæta olíufélögunum upp tap vegna lokana bensínstöðvanna: „Olíufélögunum var bætt þetta upp í mörgum tilvikum með því að fá að setja upp dælur á nýjum stöðum.“

Einar Þorsteinsson borgarstjóri segir ekkert því til fyrirstöðu að láta innri endurskoðun kanna aðdraganda samninganna og hvernig að þeim var staðið.

Lesa má meira um málið í Morgunblaðinu í dag.