Orri Steinn Óskarsson lagði upp fyrsta mark FC Kaupmannahafnar í stórleik dönsku úrvalsdeildarinnar í fótbolta í dag þegar FCK heimsótti Bröndby. FCK hirti toppsætið af erkifjendunum með 3:1 sigri.
FCK er í efsta sæti eftir leikinn, tveimur stigum á undan Bröndby. Sverrir Ingi Ingason og félagar hans í FC Midtjylland geta jafnað Kaupmannahafnarliðið að stigum með sigri á AGF en sá leikur er nýhafinn.
Heimamenn í Bröndby komust yfir með marki Nicolai Vallys en Kevin Diks jafnaði fyrir FCK eftir sendingu Orra. Staðan var jöfn, 1:1, í hálfleik en Mohamed Elyonussi kom gestunum yfir og Diks var aftur á ferðinni í uppbótartíma með mark úr vítaspyrnu.
Orri Steinn spilaði 85 mínútur fyrir FCK en Rúnar Alex Rúnarsson er varamarkvörður liðsins.