Hafinn er undirbúningur þess að Bretland verði sjálfstæður aðili í Alþjóðaviðskiptastofnuninni WTO eftir að Bretar ganga úr Evrópusambandinu. Viðskiptaráðherra Bretlands, Liam Fox, greindi frá þessu í dag. Að sögn Fox er notast við núverandi samning Evrópusambandsríkja í stofnuninni til viðmiðunar.
164 ríki eru með aðild að WTO en Bretland er aðili í gegnum Evrópusambandið. Þegar Bretar ganga úr sambandinu þarf að semja um aðild þeirra í stofnuninni.
Að sögn Fox er þetta gert til þess að takmarka áhrifin á alþjóðaviðskipti þegar Bretar ganga úr ESB. Á næstunni verður sett upp uppkast að nýjum samningum í samstarfi við WTO.
„Þetta er nauðsynlegur hluti þess að yfirgefa Evrópusambandið. Þetta mun ekki hafa áhrif á framtíðarviðskiptasamninga milli Bretlands og Evrópusambandsríkja,“ segir í skriflegri tilkynningu Fox til breska þingsins.
Forsætisráðherra Bretlands, Theresa May, hefur sagst ætla að hefja formlegar viðræður við stjórn ESB í lok marsmánaðar á næsta ári.